Նիդերլանդների արևելքում գտնվող Արնեմ քաղաքի ավիացիոն թանգարանից անհետացել է F104 Starfighter ռեակտիվ կործանիչը, ավելի ստույգ՝ նրա փոքրացված 1:2 մասշտաբով տարբերակը:
Ինչպես հայտնում է ВВС-ն, թանգարանի ղեկավարությունը կորուստը հայտնաբերել է կիրակի առավոտյան, երբ հաստատությունը բացվել էր այցելուների համար:
Թանգարանի տնօրեն Էդվին վան Բրակելը չի հասկանում, թե ինչպես են գողերը, առանց նկատվելու, թանգարանից դուրս բերել 10 մետր երկարությամբ և կես տոննա քաշով ինքնաթիռը:
Թանգարանի ղեկավարությունն ասում է, որ իրենցից փրկագին չեն ուզել, և հույս ունեն, որ ինքնաթիռը գողացել են կատակասերները, այլ ոչ թե գունավոր մետաղների գողերը: Այդ տարբերակի մասին խոսում է գողերի թողած գրությունը. «Թռավ: Կհանդիպենք հաջորդ տարի»:
Հոլանդիայում գոյություն ունեն ակումբներ, որոնք Նոր Տարվա նախաշեմին զվարճանքի համար կատարում են ամենաանհավանական գողությունները: Ամենահայտնին տեղի էր ունեցել անցած տարի Ռեյդեն քաղաքում. «Վեզուվի» ակումբի անդամները հեծանիվի վրա տարել են Բեաթրիքս թագուհու արձանիկը:
Սովորաբար կատակասերները գողոնը տանում են իրենց գյուղ և դիմավորում Նոր Տարին:
Այս անգամ «Վեզուվին» չի հաստատել, որ թանգարանից ինքնաթիռի անհետացումը իր ակումբի անդամների ձեռքի գործն է, սակայն և չի հերքել: «Սպասենք մինչև հունվարի 1-ը, այն ժամանակ պարզ կլինի»,- ասել է տնօրենը:
