Ամերիկյան New York Times Company մեդիա-ընկերությունը վերանայում է իր տարածաշրջանային պարբերականները վաճառելու հնարավորությունը: Այս մասին հաղորդվում է ընկերության կայքում:
«Առաջնային փուլում քննարկվում է Regional Media Group մասնաճյուղի վաճառքի գործարքը, որը կազմված է 16 տարածաշրջանային թերթերից, այլ տպագիր պարբերականներից, որոնք առնչվում են Halifax Media խմբի գործունեության հետ»,- ասվում է հաղորդագրության մեջ:
Halifax Media Group-ը, որը պատկանում է Daytona-Beach News Journal-ին և ԱՄՆ հարավում ևս հինգ լրատվական կազմակերպությունների ու թերթերի, գործում է Ֆլորիդայում:
NYT Company ֆինանսական գործունեության ամենամյա հաշվետվության տվյալների համաձայն` 2010 թվականին տարածաշրջանային պարբերականը, որը լույս է տեսնում ԱՄՆ տարբեր նահանգներում, ընկերությանը բերել է 11 տոկոս շահույթ, որը կազմում է 2.4 միլիարդ դոլար:
Գործարքի մասին հայտնի է դարձել NYT Company-ի գլխավոր գործադիր տնօրեն Ջանեթ Ռոբինսոնի հրաժարականի մասին լուրը ստանալուց մեկ շաբաթ հետո (ի դեպ, վերջինիս տեղը նոր տարվանից ժամանակավորապես զբաղեցնելու է ընկերության տնօրենների խորհրդի նախագահ Արթուր Զուլցներգերը):
Ռոբինսոնի հեռանալու պատճառը չի նշվում: Նա ընկերությունում աշխատել է 28 տարի և 2004 թվականից զբաղեցրել է տնօրենի պաշտոնը: Ինչպես նշվում է NYT Company կայքում, Ռոբինսոնն աշխատելու է ևս մեկ տարի` որպես մեդիա-ընկերության խորհրդատու, որը, բացի New York Times թերթից, տպագրում է Boston Globe և International Herald Tribune թերթերը:
