Միացյալ Նահանգները խիստ անհանգստացած է Ղազախստանի արևմուտքում բռնության ալիքի տարածումից: Ինչպես հաղորդում է BBC-ն, ԱՄՆ պետքարտուղար Հիլարի Քլինթոնը հանդես է եկել հայտարարությամբ՝ զսպվածության կոչ անելով կողմերին:
«Մենք ողջունում ենք Ղազախստանի կառավարության մտադրությունը՝ բռնության գործողությունների բազմակողմանի և թափանցիկ հետաքննություն անցկացնելու,- ասվում է Քլինթոնի հայտարարության մեջ։- Հանցավոր գործողությունների բոլոր մեղավորները պետք է կանգնեն արդարադատության առաջ՝ համապատասխան միջազգային նորմերի»:
Պաշտոնական տվյալներով՝ Ղազախաստանի արևմուտքում ոստիկանության և ցուցարարների միջև բախումների ժամանակ զոհվել է 15 մարդ: Նրանցից 14-ը զոհվել են Ժանաոզեն քաղաքում, որտեղ զանգվածային անկարգությունները սկսվել են ուրբաթ օրը՝ Ղազախստանի անկախության 20-ամյակի տոնակատարության ժամանակ:
Շաբաթ օրը Ժանաոզենում մտցվել է արտակարգ դրություն: Քաղաքում անջատված է համացանցը, բջջային կապը:
