ԱՄՆ հանրապետականները քննադատել են Իրաքից ամերիկյան զորքերի ամբողջական դուրսբերումը, որը իրականացրել է ԱՄՆ նախագահ Բարաք Օբաման:
CBS News-ի եթերում դեկտեմբերի 18-ին Ներկայացուցիչների պալատի նախկին խոսնակ Նյութ Գինգրիչը հայտարարել է, որ Իրաքից ԱՄՆ զորքերի դուրսբերումը այս երկրում ստեղծելու է քաղաքական վակուում, որը կարող է հանգեցնել Իրանի ազդեցության մեծացմանը: Բացի այդ, նրա խոսքերով՝ զորքերի դուրսբերումը կարող է անկայունության ստեղծել Իրաքում:
Մասաչուսեթսի նախկին նահանգապետ Միթ Ռոմնին Fox News-ին տված հարցազրույցի ժամանակ հայտարարել է, որ Օբաման ռսիկի է գնացել` որոշելով ամերիկյան զորքերը ամբողջությամբ դուրս բերել Իրաքից: Ռոմնիի կարծիքով՝ երկրում պետք է թողնել 10-30 հազարանոց զորք:
Մնացած հավանական հանրապետական թեկնածուները նույնպես քննադատել են Օբամայի այս քայլը:
Հանրապետականների կարծիքից լիովին տարբերվում է կոնգրեսմեն Ռոն Փոլի տեսակետը, որը կարծում է, որ ԱՄՆ-ն պետք է իր զորքերը դուրս բերի բոլոր այն երկրներից, որտեղ տեղակայված են դրանք:
Ամերիկյան զորքերը դուրս են բերվել Իրաքից դեկտեմբերի 18-ին: Իրաքում մնացել է մոտ 157 զինվորական` իրաքցի զինվորներին ուսուցանելու համար, և ոչ մեծ ծովային հետևակային զորք, որին հանձնարարված է պահպանել դիվանագիտական առաքելությունը:
