Այսօր «Հայելի» ակումբում ՀՀԿ-ական պատգամավոր Համլետ Հարությունյան-ՀԱԿ ներկայացուցիչ Ֆելիքս Խաչատրյան բանավեճն անսպասելի շրջադարձ ունեցավ: Ֆ. Խաչատրյանը հարցադրումներ արեց Ընտրական օրենսգրքի վերաբերյալ. օրենսգրքում կա հոդված, ըստ որի` «քվեաթերթիկը վավեր է, եթե անվավեր չէ», այսինքն` եթե գիշեր չի, ցերեկ է, կամ ընտրացուցակները հրապարակելն արգելված է, բայց ընտրություններից հետո դիտորդները կամ վստահված անձինք կարող են ստորագրված ցուցակներից քաղվածք անել, որտեղ, ըստ ՀԱԿ ներկայացուցչի, թաքնված են երկրից հեռացած քաղաքացիների անունները:
Հ. Հարությունյանը վրդովվեց` Խաչատրյանը հարցատոմսերը պատրաստ եկել է, իսկ ինքը նախապես տեղյակ չի եղել բանավեճի թեմայից. «Ես այլևս չեմ գա այստեղ, նախօրոք ասեիք, ես էլ պատրաստվեի»:
Ըստ ՀՀԿ-ական պատգամավորի` ճիշտ չէ ամբողջ կենսական ուժերը կենտրոնացնել քաղաքական բամբասանքների վրա` «ընտրությունները կեղծվելու են», «օրենսգիրքը լավը չի» և այլն:
Ըստ Ֆ. Խաչատրյանի` անհրաժեշտ է արտահերթ ընտրություններ անցկացնել. «Ժողովրդի կամքի հետ հարկավոր է հաշվի նստել: Ընդդիմությունը ճանաչվեց ժողովրդի կողմից, հաշվի են նստում ՀԱԿ կարծիքի հետ, իրենց դարդերը պատմում են ՀԱԿ-ին ու հույսը կապում են ՀԱԿ-ի հետ»:
