2011 թվականը սոցիալական և տնտեսական առումով հիմնականում կրկնում էր նախորդ տարին, նկատելի և լուրջ փոփոխություններ չեղան: Այսօր լրագրողների հետ հանդիպմանը նման գնահատական տվեց «Նոր ժամանակներ» կուսակցության նախագահ Արամ Կարապետյանը:
Ըստ նրա` քաղաքական էլիտայի որոշակի հատված դեգրադացվել է, իսկ 2012 թ. բյուջեի ընդունումը ցույց տվեց, որ իշխանությունն էլ է հոգնել:
Ա. Կարապետյանը նշեց, որ պաշտոնանկություններին չտրվեց նորմալ բացատրություն:
ՀՀԿ-ական պատգամավոր, ԱԺ սոցիալական հարցերի հանձնաժողովի նախագահ Հակոբ Հակոբյանի բնորոշմամբ` ՀՀ-ի համար 2011 թվականը տնտեսական առումով չի կարելի վատը համարել, հույս կա, որ գնաճը կպահպանվի նախանշվածի սահմաններում: Իհարկե, դեռևս ունենք աղքատության մեծ ցուցանիշ, բայց 2012 թ. բյուջեում նշված են դրա դեմ պայքարի մեխանիզմները:
Պատգամավորը կադրային փոփոխությունները նորմալ համարեց, ըստ նրա` հակառակ դեպքում ժողովուրդն է կատարում փոփոխություններ, բայց արդեն եգիպտական սցենարով:
Հ.Հակոբյանը կոչ արեց քաղաքական դաշտում հստակեցում մտցնել. «Եկեք մի քիչ հեշտացնենք ժողովրդի խնդիրը` քաղաքական ուժերը բաժանվեն իշխանական և ընդդիմադիր ուժերի, ժողովուրդն էլ ընտրի կամ իշխանությանը, կամ ընդդիմությանը»,- ասաց Հ. Հակոբյանը` փաստելով, որ նախկինում մենք ընտրել ենք քաղաքական կամ կուսակցական գործիչներին:
«Ընտրությունները կլինեն բոլոր անցած ընտրությունների նման: Եվ իշխանությունը, և ընդդիմությունը շահագրգիռ են թափանցիկ ընտրություններ անցկացնել, որպեսզի բացառվեն հետընտրական գործընթացները, այսինքն` համոզված լինեն իրենց ընտրության մեջ»,- վստահեցրեց պատգամավորը և հավելեց, որ հասարակությունը պետք է «իմ»-ը տեսնի վաղվա «մեր»-ի մեջ:
