Լոնդոնը գալիք Նոր տարին դիմավորում է նոր շքեղ սրճարանի բացումով, որտեղ վաճառվում է Եվրոպայի ամենաթանկ սուրճը: Ինչպես հաղորդում է բրիտանական The Daily Mail պարբերականը, DSTRKT սրճարանում ցանկացողները կարող են պատվիրել 110 դոլար արժողությամբ սուրճ, որը գրեթե 35 անգամ ավելի թանկ է, քան մյուս սրճարաններում մատուցվող սուրճը:
Բանն այն է, որ DSTRKT-ում սուրճի պատրաստման համար օգտագործում են ինդոնեզիական լեգենդար «Քոփի լյուվակ» սուրճի հատիկները: Այն իրենից ներկայացնում է հատիկ, որն անցել է մուսանգի աղեստամոքսային համակարգով: Արտաքինից կատու հիշեցնող այդ կենդանին սնվում է սուրճի հատիկներով, որոնք նրա ստամոքսում ամբողջությամբ չեն մարսվում: Արդյունքում տեղի բնակիչները մեծ խանդավառությամբ հավաքում են այդ կենդանիների մարսողական համակարգով անցած հատիկները, որոնք լավ լվանալուց և չորացնելուց հետո ուղարկում են աշխարհի ամենաշքեղ ռեստորանները:
Մասնագետները պնդում են, որ նման ձևով «վերամշակված» հատիկները յուրահատուկ համ են ստանում:
