Ամանորին ընդառաջ ավելի ու ավելի է մեծանում այն մարդկանց թիվը, ովքեր շատ են հավատում գուշակություններին ու սնահավատություններին:
Այս կապակցությամբ «Առաջին լրատվական»-ը զրուցեց Եռաբլուրի Սրբոց Վարդանանց նահատակաց եկեղեցու հոգևոր հովիվ Տեր Պարթև քահանա Մուրադյանի հետ:
Վերջինս մեզ հետ զրույցում ասաց, որ մարդու բնությունն այնպիսին է, որ նա չի կարող ոչ մի բանի չհավատալ: Մարդու կյանքում ինչ-որ մի բանին հավատալն առաջնահերթ է նրա բնության, էության մեջ: Տեր Պարթև քահանայի խոսքով` մեր իրականության մեջ եղել են ժամանակներ, երբ եկեղեցի գնալու սովորույթը բացակայել է մեր կյանքից, ու դրա տեղը եկել են լրացնելու գուշակությունները:
Նրա խոսքով` քրիստոնյաները հավատում են խաչին` որպես փրկության նշան, կան մարդիկ, որ հավատում են աչքի հուլունքի զորությանը: Ինչ վերաբերում է այդ ամենի հանդեպ եկեղեցու դիրքորոշմանը, ապա տեր Պարթևը նշեց, որ եկեղեցին դեմ է տարբեր տիպի գուշակություններին ու սնահավատություններին:
«Աստված չի ավանդել աչքի հուլունքը: Այդ մարդկային մտքի ստեղծված գործիք է: Դա ժողովրդական հավատալիք է, որը ստեղծել է մարդը: Նույնը վերաբերում է գուշակություններին, սուրճի բաժակ նայելուն»,- նշեց Եռաբլուրի Սրբոց Վարդանանց նահատակաց եկեղեցու հոգևոր հովիվն` ընդգծելով, որ դրանք մարդկային երևակայության արդյունք են, ոչ աստվածային երևույթներ:
Այն հարցին` արդյո՞ք չի աճել սնահավատություններին ու գուշակություններին հավատացող մարդկանց թիվը, քահանան պատասխանեց, որ դրանց թիվը գնալով նվազում է:
