Նարեկը դեռ չգիտի, որ էլ չի տեսնելու, «Առաջին լրատվական»-ի հետ զրույցում տեղեկացրեց Նարեկ Ավետիսյանի հայրը՝ Անդրանիկ Ավետիսյանը, խոսելով որդու առողջության մասին:
Դեկտեմբերի 14-ին` ժ. 07:20-ի սահմաններում ԼՂՀ N զորամասի ճաշարանի պետ, ենթասպա Արմեն Լավրենտի Թովմասյանը, իր հանձնարարությունից հրաժարվելու պատճառով զորամասի ճաշարանում մեկ անգամ ձեռքով, ապա ձեռքին գտնվող երկաթյա շղթայով հարվածել է նույն զորամասի ժամկետային զինծառայող Նարեկ Ավետիսյանի դեմքին: Վերջինիս պատճառվել է մարմնական վնասվածք` աջ ակնագնդի ջնջխմամբ, վերին կոպի հեմատոմայի տեսքով: Երևանի Մալայանի անվան ակնաբուժական կլինիկայում հեռացվել է այս տարվա գարնանային զորակոչին Էջմիածնից զորակոչված 18-ամյա ժամկետային զինծառայող, շարքային Նարեկ Ավետիսյանի աջ աչքը:
«Տղաս դեռ չգիտի, որ երբեք չի վերականգնվելու տեսողությունը, այսինքն՝ չգիտի, որ աչքը հեռացվել է: Նա մտածում է, թե մի քանի օր անց վերադառնալու է զորամաս»,- ցավով նշեց Նարեկի հայրը:
Նա տեղեկացրեց, որ այս պահին Նարեկի առողջությունը բավարար է գնահատվում: Այն հարցին, թե Նարեկին տեղափոխելո՞ւ են զորամաս, հայրը պատասխանեց, որ չգիտի:
Փաստի առթիվ ԼՂՀ Ստեփանակերտի ՌՈ բաժնի կողմից նախապատրաստած նյութերով ՀՀ ՊՆ Քննչական ծառայության երրորդ կայազորային քննչական բաժնում ՀՀ քրօր-ի 375 հոդվածի 1-ին մասի հատկանիշներով այսօր հարուցվել է քրեական գործ, կատարվում է նախաքննություն:
