Մենք` հայերս, սիրում ենք ապրել այնպես, որ մեզ շրջապատող մարդիկ զարմանան ամեն օր և ամեն ժամ: Սիրում ենք շլացուցիչ հագնվել, ճոխ սեղաններ «գցել», ճոխ նվերներ տալ այն դեպքում, երբ յուրաքանչյուրիս արտաբերած երկրորդ արտահայտությունը «փող չկա»-ն է: Եվ այդ արտահայտությունը չմոռանալով` մենք շարունակում ենք ոչ միայն «յոլա գնալ» և դիմակայել ու հարմարվել այս աննախադեպ, օրեցօր աճող գնային քաղաքականությանը, այլև կատարել ամանորյա գնումներ, հանել հարևանների «աչքը» `մեր ամանորյա սեղաններով, կենդանական աշխարհի ներկայացուցիչների բազմապիսի բդիկներով, պանրի տարբեր տեսակներով, չիր ու չամիչով, խնձորով և արաքայախնձորով` չմոռանալով նաև փոքրիկներին ուրախացնել: Իսկ ի՞նչը կարող է ուրախացնել մեր փոքրիկներին ամանորյա գիշերը. Իհարկե, Ձմեռ պապն ու Ձյունանուշը: Վաղուց արդեն կարելի է հանդիպել հայտարարությունների, որտեղ իրենց ծառայություններն են մատուցում Ձմեռ պապն ու Ձյունանուշը` խոստանալով փոքրիկների ամանորյա գիշերը դարձնել հեքիաթային և անմոռանալի:
Եթե դու շարքային քաղաքացի ես և ստանում ես ամսական 35-70 հազար դրամ, քեզ մոտ չի ստացվի ունենալ և՛ ճոխ սեղան, և՛ ուրախացնել բալիկներիդ, քանի որ Ձմեռ պապիկի և իր թոռնիկի այցելությունը թանկ արժե: Այսօր բազմաթիվ ընկերություներ և անհատ ձեռներեցներ պատրաստ են դեկտեմբերի 31-ից մինչ հունվարի 6-ը Ձմեռ պապ և Ձյունանուշ տրամադրել: «Բում-բումիկ» ընկերությունը դեկտեմբերի 31-ին տարբեր ժամերի տարբեր գներով պատրաստ է Ձեզ տրամադրել Ձմեռ պապ և Ձյունանուշ: Մեզ հետ զրույցում ընկերության ներկայացուցիչն ասաց, որ եթե ցանկանում եք, որ Ձմեռ պապն ու Ձյունանուշը այցելեն երեկոյան ժամը 7-11-ը, ապա նրանց 15-20 րոպե տևողությամբ այցելությունը կարժենա 15000-20000 դրամ, 12-ին այլևս ազատ Ձմեռ պապ և Ձյունանուշ չունեն, իսկ գիշերը մեկից հետո Ձմեռ պապիկի և Ձյունանուշիկի գները «թռչում են»` հասնելով 70000 դրամի: Մենք զրուցեցինք ևս մի քանի անանուն կազմակերպությունների և անհատների հետ, ովքեր նույնպես Ձմեռ պապիկի և Ձյունանուշիկի ծառայություններ են մատուցում. այստեղ գները տատանվում են 20000-35000 դ. սահմաններում: Չմոռանանք փաստել, որ բոլոր կազմակերպություների և անհատների տրամադրած Ձմեռ պապիկն ու Ձյունանուշիկը դերասաններն են, նոր զգեստով են, ունեն իրենց խաղերի, երգերի ծրագիրը, և մի քանիսն էլ նույնիսկ նվերներ են տալիս: Մնում է միայն պատրաստել գումարը, վստահել հայ դերասան Ձմեռ պապիկներին և Ձյունանուշիկներին և վայելել ամանորյա գիշերը: