Ռուսական Regnum լրատվական գործակալության փոխանցմամբ՝ Միջազգային հանրապետական ինստիտուտը (IRI) հրապարակել է Թուրքիայում իրականացրած հարցախույզի արդյունքները։ Հարցախույզն անցկացվել է համայն Թուրքիայում հոկտեմբեր-նոյեմբեր ամիսներին և առնչվել է Թուրքիայի ներքաղաքական վիճակին։ Հարցախույզին մասնակցել է 5000 մարդ։
Հարցախույզի մասնակիցների 41 տոկոսը ցանկանում է երկրի նախագահի պաշտոնում տեսնել վարչապետ Էրդողանին, իսկ 36 տոկոսն էլ պատրաստ են իրենց քվեն տալ մեկ այլ թեկնածուի օգտին։
41 տոկոսը դեմ է, որ Թուրքիան անցում կատարի նախագահական կառավարմանը (նախագահն առավել մեծ լիազորություններ է ստանում – 1-in.am)։ 17 տոկոսը կողմ է դրան։
42 տոկոսը ցանկանում է որպես խորհրդարանական մեծամասնություն տեսնել իշխող «Արդարություն ու զարգացում» կուսակցությանը (ԱԶԿ), 19 տոկոսը՝ ընդդիմադիր «Ժողովրդա-հանրապետական» կուսակցությանը (ԺՀԿ), իսկ 10 տոկոսը՝ «Ազգայնական շարժում» կուսակցությանը (ԱՇԿ)։
Թուրք առաջնորդներից (կուսակցապետ) ամենամեծ վստահությունը վայելում է Էրդողանը՝ 44 տոկոս, ապա գալիս են ԺՀԿ նախագահ Քեմալ Քըլըչդարօղլուն՝ 16 տոկոս և ԱՇԿ նախագահ Դևլեթ Բահչելին՝ 7 տոկոս։
