Գաբալայի ռադիոլոկացիոն կայանը պահելու համար ադրբեջանական կողմը որքան էլ մեծ գումարներ պահանջելու լինի, Ռուսաստանը, միևնույն է, կվճարի դրանք: «Առաջին լրատվական»-ի հետ զրույցում այս մասին հայտարարեց գեներալ-մայոր Արկադի Տեր-Թադևոսյանը (Կոմանդոս)՝ անդրադառնալով երեկ Բաքվում սկսված Գաբալայի ռադիոլոկացիոն կայանի վարձակալության պայմանագրի երկարաձգման մասին բանակցություններին:
Հիշեցնենք, որ երկարաձգման մասին պայմանավորվածությունը նախկինում ձեռք էր բերվել երկու երկրների պաշտպանական գերատեսչությունների ղեկավարների միջև, սակայն հարցի ֆինանսական կողմը բաց էր մնացել: Նախարարների պայմանավորվածության համաձայն՝ նոր պայմանագիրը պետք է հաստատված լինի արդեն հաջորդ տարվա փետրվար-մարտ ամիսներին: Հատկանշական է, որ ռուսական կողմն առաջարկում է պահպանել ներկայում գործող՝ 7 մլն դոլարի վարձավճարը, միևնույն ժամանակ նվազեցնելով վարձվող տարածքի չափը: Սակայն Ադրբեջանը նոր պայմաններ է ներկայացրել ռուսական կողմին:
Արկադի Տեր-Թադևոսյանի խոսքով, հաշվի առնելով Ադրբեջանի հետ միլիարդավոր դոլարների դրամաշրջանառությունը՝ Ռուսաստանը գումարներ չի խնայի պահելու համար Գաբալայի ռադիոլոկացիոն կայանը: «Ռուսաստանն այդ կայանից չի հրաժարվի և կվճարի Ադրբեջանի պահանջած ցանկացած գումար: Սակայն հարցն այն է, որ այն վաղուց հնացել է և անգամ 7 միլիոն դոլար չարժե: Այդ կայանն անցած սերնդի է՝ կառուցված խորհրդային տարիներին, այն ժամանակվա տեխնոլոգիաներով: Ուղղակի ռուսներին այդ տարածքը պետք է, որպեսզի այնտեղ նոր կայան կառուցեն: Հիմա ռուսներին պետք է ամրապնդվել այդ տեղում, ինչն էլ նրանց թույլ է տալիս վերահսկողության տակ պահել Մերձավոր Արևելքը»,- նկատեց գեներալ-մայորը:
Հարցին՝ ժամանակը չէ՞, որպեսզի հայկական կողմն էլ իր տարածքում տեղակայված ռուսական ռազմաբազայի համար սկսի վարձավճար պահանջել, այլ ոչ թե՝ ինքը վճարի ռուսական կողմին, Տեր-Թադևոսյանը նկատեց. «Մենք ռուսներին վատ ենք սովորեցրել: Նրանք սովորել են, որ մենք բարի մարդիկ ենք: Հիմա ինչ-որ բան փոխելու համար ուշ է, անիմաստ է կենտրոնանալ այդ հարցի վրա: Մեր քաղաքականությունը սխալ է եղել: Իմ կարծիքով՝ Հայաստանում ռազմաբազայի տեղակայման համար ռուսներից վարձավճար պահանջելն այլևս շատ բարդ հարց է»:
