ՀՀԿ-ական Ռաֆիկ Գրիգորյանին խնդրեցինք մեկնաբանել Սերժ Սարգսյանի ելույթի հատվածը, որտեղ նա հաստատել է մամուլի հրապարակումները, որ ինքը պահանջել է ԲՀԿ-ից` կողմնորոշվել նախագահի թեկնածուի հարցում: Գրիգորյանը, սակայն, նշեց, որ այդ պահանջներն ամենևին էլ թեկնածուին սատարելու մասին չէին: «Նա նկատի ուներ ոչ թե նախագահի թեկնածուին սատարելը, այլ ընդհանուր պահանջներ էր առաջ քաշում ընդհանուր աշխատաոճի առումով, և նման պահանջներ նա առաջ է քաշում ոչ միայն կոալիցիայի, այլև մեր հանդեպ: Ինքը հետևելու է, որ ասածները հերթականությամբ իրականացվեն, ասածի ապացույցը կադրային փոփոխություններն են, որոնք շարունակություն են ունենալու»,- ասաց Ռաֆիկ Գրիգորյանը:
Հիշեցնենք, որ Սերժ Սարգսյանը ասել էր. «Այստեղ ուզում եմ անդրադառնալ այն ասեկոսեներին, այն խոսակցություններին, որ վերջին շրջանում պտտվում են որոշ քաղաքական շրջանակներում, թե իբրև ես վերջնագիր եմ ներկայացրել «Բարգավաճ Հայաստան» կուսակցությանը: Եվ ղեկավարվելով իրենց տրամաբանությամբ` իրենց իսկ ժարգոնով ասած, փորձում են թասիբի գցել «Բարգավաճ Հայաստան» կուսակցությանը և կոնկրետ Գագիկ Ծառուկյանին: Բոլորիդ է հայտնի, որ ես երբեք որևէ մեկի հետ վերջնագրով չեմ խոսել, մանավանդ` իմ գործընկերների հետ: Նրանց ասած այդ վերջնագրերը պարզապես իմ պահանջներն են ինչպես իմ կուսակիցների, այնպես էլ մեր կոալիցիոն գործընկերների նկատմամբ: Կարծում եմ, որ սա օրինաչափ է, և հակառակը ենթադրել` պարզապես անտրամաբանական է»:
