ՀՀԿ-ական պատգամավոր Հովհաննես Սահակյանի խոսքով, ինքն այն մարդը չէ, որ մեկնաբանի աշխարհահռչակ հայազգի շանսոնյե Շառլ Ազնավուրի այն խոսքերը, թե «ներկայումս Հայաստանում տեղի է ունենում ներքին ցեղասպանություն», և որ «Հայաստանին շնչելու հնարավորություն չտալով` այդ պետության կառավարությունը զրկում է երկիրը երիտասարդությունից, որը հեռանում է»: Այս մասին նա ասաց «Առաջին լրատվական»-ի հետ զրույցում:
Պատգամավորի խոսքով, երբ շանսոնյեն ասում է, որ արտագաղթի խնդիրն արդեն ոչ միայն քաղաքական, այլ համամարդկային բնույթ է կրում, նկատի ունի տնտեսական մեծ ճգնաժամը: «Ազգի նմանատիպ մեծ որդիների խոսքերը ես չէ, որ պետք է մեկնաբանեմ, և դրանք կարելի է ընդհանրապես չմեկնաբանել: Շառլ Ազնավուրի ասածներին ո՞ր տեսանկյունից գնահատական տամ: Չեմ կարծում, որ ես այն մարդն եմ, ով նրա կատարած գործերին, քայլերին պետք է գնահատականներ տա: Նրան գնահատականներ կարելի է տալ միայն դրական առումով»,- ասաց խորհրդարանականը:
Նշենք, որ Ազնավուրը Մոսկվայում հայտարարել է, որ ներկայումս Հայաստանում տեղի է ունենում ներքին ցեղասպանություն, և որ ինքը դա քաղաքականապես անընդունելի է համարում:
«Հայաստանին շնչելու հնարավորություն չտալով` այդ պետության կառավարությունը զրկում է երկիրը երիտասարդությունից, որը հեռանում է: Այս իմաստով խնդիրն արդեն ոչ միայն քաղաքական է, այլ համամարդկային: Այն պետք է շտապ լուծել»,- ասել է հայազգի շանսոնյեն:
