Ըստ գիտական նոր տեսության՝ ալկոհոլի օգտագործման չափն ուղղակիորեն ազդում է անապահով սեքսով զբաղվելու հավանականության վրա:
Հետազոտողները պարզել են, որ արյան մեջ ալկոհոլի մակարդակի յուրաքանչյուր 0.1 միլիգրամով բարձրացումը 5 տոկոսով մեծացնում է անապահով սեռական հարաբերություններ ունենալու հավանականությունը:
FoxNews-ը գրում է, որ կանադացի գիտնականներն ուսումնասիրել են 12 հետազոտություններ, որոնք փորձել են պարզել ալկոհոլի և սեռական հարաբերությունների ապահովության կապը: Բոլոր հետազոտությունների դեպքում գիտնականները մասնակիցներին բաժանել են երկու խմբի և խմբերից մեկին խնդրել են ալկոհոլ օգտագործել, մինչդեռ մյուս խմբում ոչ մեկը չի խմել: Այնուհետև նրանց հարցրել են, թե արդյո՞ք կզբաղվեին չպաշտպանված սեքսով։
Ուսումնասիրության արդյունքներից ելնելով՝ գիտնականները բացատրում են, թե ինչու են ալկոհոլ օգտագործած մարդիկ ավելի շատ զբաղվում չպաշտպանված սեռական հարաբերություններով: Հետազոտության հեղինակ Յուրգեն Ռեհմն ասում է, որ ալկոհոլն ազդում է նրանց որոշումների վրա:
