Կենտրոնական բանկի հրապարակած ԿԲ «Բանբերի» համաձայն՝ ՀՀ վճարահաշվարկային համակարգը 2011 թ. երրորդ եռամսյակի ընթացքում բնութագրվել է կայուն զարգացման միտումներով:
ՀՀ տարածքում բանկային համակարգով իրականացված անկանխիկ վճարումների ծավալը երրորդ եռամսյակում կազմել է 5,496 մլրդ դրամ (քանակը՝ 2,986,472), ընդ որում՝ ԿԲ վճարային համակարգերով իրականացված վճարումների ծավալը կազմել է 4,658 մլրդ դրամ, իսկ քանակը՝ 1,031,869: ԿԲ համակարգերով իրականացված անկանխիկ վճարումների ծավալը նախորդ տարվա երրորդ եռամսյակի համեմատ ավելացել է 17.4%-ով (689 մլրդ դրամով), իսկ քանակը՝ 20%-ով (170,940-ով):
2011 թ. երրորդ եռամսյակում ՀՀ տարածքում վճարային քարտերով իրականացվել է 188 մլրդ դրամի 3,747,812 գործառնություն: Այդ թվում՝ քարտերով անկանխիկ վճարումների ծավալը կազմել է մոտ 16.7 մլրդ դրամ: Նշված անկանխիկ գործառնությունների ծավալում ինտերնետ միջավայրում իրականացված գործառնությունների ծավալը կազմել է 3.2 մլրդ դրամ (այդ թվում՝ էլեկտրոնային առևտուր՝ 0.8 մլրդ դրամ, քարտից քարտ փոխանցումներ՝ 2.4 մլրդ դրամ):
ՀՀ տարածքում շրջանառության մեջ գտնվող մեկ վճարային քարտով իրականացված ամսական կանխիկացման գործառնությունների ծավալը կազմել է մոտ 64 հազար դրամ, իսկ անկանխիկը՝ 6 հազար դրամ: Սա վկայում է, որ ՀՀ քաղաքացիները վճարային քարտերն օգտագործում են հիմնականում աշխատավարձ ստանալու համար:
