Կոալիցիայի՝ միասնական համամասնական ցուցակով հանդես գալու հարց այս պահին օրակարգում չկա։ Այս մասին «Ազատություն» ռադիոկայանի հետ զրույցում տեղեկացրել է Անվտանգության խորհրդի քարտուղար, «Օրինաց երկիր» կուսակցության ղեկավար Արթուր Բաղդասարյանը:
«Բնականաբար, ես հնարավոր համարում եմ, որ կարող են լինել կոալիցիոն քննարկումներ ինչպես երկրի ներքին, այնպես էլ արտաքին տարբեր կարևորագույն խնդիրների շուրջ: Նույնը վերաբերում է ընտրությունների մասնակցության ձևաչափին, ընտրությունների անցկացման կանոններին», – ասել է Բաղդասարյանը։
Պատասխանելով այն հարցին՝ եթե կոալիցիոն երեք կուսակցությունները մեկ ցուցակով գնան ընտրություններին, դա ինչո՞վ պայմանավորված կլինի, Բաղդասարյանն ասել է. «Դրանք երկարաժամկետ, տեսական բնույթի, օդում կախված հարցադրումներ են: Կա երեք կուսակցություն. ո’չ Հանրապետականը, ոչ «Օրինաց երկիր»-ը, ոչ «Բարգավաճ Հայաստան»-ը չեն առաջարկել այս օրակարգային հարցով կազմակերպել քննարկում»:
Ըստ իշխող կոալիցիայի մաս կազմող կուսակցության ղեկավարի՝ քաղաքական կոալիցիայի ներսում անհաղթահարելի տարաձայնություններ չկան: ԲՀԿ-ի և ՀՀԿ-ի միջև առկա հակասությունների մասին լուրերի առնչությամբ ՕԵԿ-ի ղեկավարն ասել է, թե դրանք կարող են «ինչ-որ տեխնիկական բնույթի խնդիրներ լինել»:
ՕԵԿ-ի ղեկավարը նաև ասել է, որ իր համար դժվար է եզրահանգումներ անել, թե ընտրություններից հետո կոալիցիան նույն տեսքով կպահպանվի՞, թե` ոչ, և որ ամեն ինչ կախված է իրադարձությունների զարգացումից. «Քաղաքականության մեջ ամեն ինչ հնարավոր չէ կանխատեսել, կախված կլինի, թե ով ինչ քվեներ կհավաքի, ինչպիսի իրավիճակ կստեղծվի»։
Անդրադառնալով ընդդիմադիր Հայ ազգային կոնգրեսի ներկայացուցիչների այն հայտարարություններին, թե իշխանությունները խոսում են ազատ, արդար ընտրությունների մասին, բայց երբեք չեն հայտարարել, որ ընտրակաշառք չի բաժանվելու կամ կիսահանցագործ տարրերը չեն մասնակցելու ընտրություններին և այլն, Բաղդասարյանն ասել է. «Մեր հասարակության մեջ կան տարբեր մարդիկ, և քաղաքական ուժերը չեն կարող բոլորի համար պատասխանատվություն կրել: Մեկը կիրթ մարդ է, մեկը խուլիգան է, մեկը կարող է ընտրական գործընթացը քաղաքակիրթ կազմակերպել, մեկը կարող է գնալ, ապականել այդ գործընթացը: Ովքե՞ր են անում այդ ընտրակեղծիքները` մարդիկ: Ես կարծում եմ, որ ոչ մի կուսակցություն շահագրգռված չէ, որ իր շարքերում ներառի բացասական վարքագիծ ունեցող մարդանց: Ամեն կուսակցություն ինքն է որոշելու, թե ում իր ցուցակում ներգրավի: Եթե այդ ցուցակում կան կրիմինալ, բացասական կերպարներ, ուրեմն այդ ցուցակին չպետք է քվեարկեք, քվեարկեք այն ցուցակին, որտեղ դրանք չկան»:
Խոսելով վերջին պաշտոնանկությունների, մասնավորապես ԱԺ-ի նախագահ Հովիկ Աբրահամյանի հրաժարականի և ոստիկանապետի փոփոխության մասին Բաղդասարյանն ասել է, թե Հանրապետական կուսակցությունը իր պայքարի «մարտավարության ծիրում» որոշում է կայացրել, որ Ազգային ժողովի նախկին նախագահ Հովիկ Աբրահամյանը պետք է զբաղվի նախընտրական շտաբի կազմակերպման խնդիրներով. «Կան որոշումներ, որոնք կայացնում է հանրապետության նախագահը` ելնելով իր սահմանադրական մանդատից»: