Սիրիայի Իդլիբ մարզում միանգամից մի քանի հարյուր զինվորականներ անցել են ապստամբների կողմը: Այս մասին հաղորդվում է The Guardian թերթի խմբագրական բլոգում:
Համապատասխան բովանդակությամբ տեսանյութ է հայտնվել նաև համացանցում: Դրանում երևում է, թե ինչպես են զինվորները ապստամբների հետ մասնակցում Ասադի վարչակարգի դեմ ցույցերին:
Որոշ ժամանակ անց Կինսաֆրա գյուղի բնակիչները բարձրացրել են «անկախության դրոշը» (այն Սիրիայի պետական դրոշից տարբերվում է նրանով, որ վերին գիծը ոչ թե կարմիր է, այլ կանաչ) և անհնազանդություն հայտնել վարչակարգին:
Հաղորդվում է, որ Դարաա քաղաքում նույնպես ցուցարարների կողմն է անցել բանակի ոչ մեծ ստորաբաժանում:
Սիրիացի ապստամբները հաղորդում են, որ ամբողջ երկրում շարունակվում են բախումները զինվորականների և ներքին անվտանգության ուժերի հետ: Դեկտեմբերի 13-ի կեսօրվա դրությամբ զոհվել է 18 մարդ:
Սիրիայում հակակառավարական հուզումները սկսվել են ընթացիկ տարվա մարտի կեսին: ՄԱԿ-ի վերջին զեկույցի համաձայն՝ մինչ այժմ զոհվել է շուրջ 5000 մարդ:
