Թուրքական Taraf թերթի փոխանցմամբ՝ «Քրդստանի աշխատավորական» կուսակցության (PKK) դեմ պայքարում գործածված F-16 կործանիչները սխալ կոորդինատներ են ստացել, այդ պատճառով էլ, PKK-ի զինյալներին գնդակոծելու փոխարեն, գնդակոծել են ամայի տարածություններ։ Այս մասին գրում է Taraf-ի թղթակից Մեհմեթ Բարանսուն։
Վերջինիս խոսքերով՝ այդ դեպքը գրանցվել է այս տարվա հոկտեմբերին՝ 2-րդ բանակային հրամանատարության գոտում։ Վերջինիս հետախուզական ծառայությունը հաղորդել է, որ երկրի հարավարևելյան հատվածում ընկած Շեմդինլիի շրջանում տեղակայվել են PKK-ի 370 զինյալներ։ Դրանից հետո ռազմաօդային ուժերին հրամայվել է ռմբակոծել այդ տեղանքը։
Սակայն այդ երեք էջանոց գաղտնի հրամանում իրական կոորդինատորների փոխարեն կեղծ կոորդինատներ են նշվել։ Ընդհանուր առմամբ, փոփոխության է ենթարկվել 18 կոորդինատ, ինչի արդյունքում F-16 կործանիչները, PKK-ականների գտնվելու վայրի փոխարեն, հարվածներ են հասցրել դրանից կիլոմետրերով հեռու ընկած դատարկ լեռներին։
Հիշեցնենք, որ Taraf թերթը Թուրքիայում ունի ամենասարսափահարույց թերթի համբավ։ Պատահական չէ, որ այս տարվա մարտի կեսերին WikiLeaks-ը հրապարակման նպատակով հենց նրան էր հանձնել Թուրքիային առնչվող 11.000 հաղորդագրությունները։
Ի դեպ, 2010 թվականի հունվարի 20-ին հենց Taraf-ն առաջինը բարձրաձայնեց 2003 թվականին պլանավորված Balyoz ռազմական հեղաշրջման պլանի մասին:
