Այսօր ԱԺ-ում մեկնարկեցին ԱԺ մարդու իրավունքների պաշտպանության և հանրային հարցերի մշտական հանձնաժողովի կազմակերպած` ՀՀ Ազգային անվտանգության խորհրդի միջգերատեսչական հանձնախմբի կողմից մշակված «Մարդու իրավունքների պաշտպանության ազգային ռազմավարության» նախագծի վերաբերյալ խորհրդարանական լսումները:
Ողջույնի խոսքով հանդես եկան ՀՀ ԱԺ փոխխոսնակ Էդուարդ Շարմազանովը, ՀՀ Ազգային անվտանգության խորհրդի քարտուղար Արթուր Բաղդասարյանը, ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Արամ Սաֆարյանը, Մարդու իրավունքների պաշտպան Կարեն Անդրեասյանը, ՀՀ-ում ԵՄ պատվիրակության ղեկավար, դեսպան Տրայան Հրիստեան: Լսումներին մասնակցում են ՀՀ-ում դիվանագիտական կորպուսի, միջազգային կազմակերպությունների ներկայացուցիչներ:
Լսումներում ներկայացվեց Մարդու իրավունքների պաշտպանության ազգային ռազմավարությունը: Արթուր Բաղդասարյանը նշեց, որ փաստաթուղթը հունվարին կքննարկվի ՀՀ Ազգային անվտանգության խորհրդում:
Փաստաթուղթը ներառում է Մարդու իրավունքների պաշտպանության բնագավառում առկա իրավիճակը, այդ ոլորտում ՀՀ կողմից որդեգրված քաղաքականությունը, Մարդու իրավունքների պաշտպանության հիմնական միջոցառումները, քաղաքականությունը առանձին ոլորտներում, Մարդու իրավունքների պաշտպանության ռազմավարության դրույթներից բխող գործողությունների ծրագիրը:
Մարդու իրավունքների պաշտպան Կարեն Անդրեասյանը իր ելույթում նշեց, որ բովանդակային առաջարկություններ են ներկայացրել փաստաթղթի հեղինակներին, բայց կարևորը գործընթացն է, և հասարակությունը փաստաթղթի նկատմամբ պետք է ունենա սեփականության զգացողություն:
«Այսօր այս ռազմավարությունը իսկապես որակյալ փաստաթուղթ է, մի շարք հարցերի վերաբերյալ որակյալ դիտարկում, բայց եթե լինեն ավելի լավ առաջարկներ, կարելի է ներառել: Մարդիկ ցանկանում են պաշտպանել իրենց իրավունքները, 2016-ին մենք կվայելենք այս փաստաթղթի արդյունքները»,- նշեց նա` արժևորելով փաստաթուղթը և հորդորելով քաղաքական կամք ցուցաբերել այն կյանքի կոչելու ճանապարհին:
ՀՀ-ում ԵՄ պատվիրակության ղեկավար, դեսպան Տրայան Հրիստեան նշեց. «Բոլորս հավաքվել ենք, որպեսզի կյանքի կոչվի համագործակցության գաղափարը, դեկտեմբերի 6-ին ՀՀ-ի և ԵՄ-ի միջև հանդիպումներ եղան, գալիք ամիսներին շատ կարևոր կլինի նշել, որ այս փաստաթղթում ներկայացված առաջնահերթությունները չեն մնա թղթի վրա, այլ գործնականում իրականություն կդառնան»:
