Թուրքական Anadolu գործակալության փոխանցմամբ՝ ադրբեջանական մեծաթիվ բնակչություն ունեցող Իգդիրում գործող և խիստ հակահայկական ուղղվածության, այսպես կոչված՝ «Հայերի անհիմն պնդումների դեմ պայքարի միություն» (ASIM-DER) կազմակերպության նախագահ Գյոքսել Գյուլբեյն իր դժգոհությունն է հայտնել հայկական և ռուսական լրատվամիջոցների գործունեությունից.
«Հայկական և ռուսական լրատվամիջոցները «զբաղված» են մեր կազմակերպության մութ հակաքարոզչությամբ։ Հայկական լրատվամիջոցներից մեկում տեղ գտած տեղեկատվության համաձայն՝ մենք մեր գործունեության համար գումարներ ենք ստանում Ադրբեջանից, որն էլ դրա արդյունքում ուղղորդում է մեր գործողությունները։ Այսպիսի տեղեկատվություն տարածում է նաև ռուսական մամուլը։
Ես ցանկանում եմ ընդգծել, որ այդ տեղեկատվությունը «չի համապատասխանում» իրականությանը, քանի որ մենք «անկախ կազմակերպություն» ենք։ Այդօրինակ պնդումներն «անհիմն» են»։
Հիշեցնենք, որ օրեր առաջ էլ Գյուլբեյը հայտարարել էր, թե Լեռնային Ղարաբաղ այցելող Թուրքիայի քաղաքացիներին «ստիպում են ստորագրել» մի փաստաթուղթ, որի վրա նշված է հետևյալը. «Ես Լեռնային Ղարաբաղը ճանաչում եմ որպես հայկական անկախ պետություն»։ Հետագայում սա հերքվեց ԼՂՀ-ի կողմից։
