Պարզ է, որ ՌԴ իշխանությունները զգում են հասարակական դժգոհությունը, բայց միաժամանակ շարունակում են ամեն կերպ ցույց տալ, որ իրենք ճիշտ են, և բացառվում է, որ զիջումների գնան: «Առաջին լրատվական»-ի հետ զրույցում նման տեսակետ հայտնեց Ռազմավարական և ազգային հետազոտությունների հայկական կենտրոնի տնօրեն Մանվել Սարգսյանը:
«Արդեն իսկ երևում է, որ ՌԴ իշխանություններն անարձագանք կթողնեն ժողովրդի պահանջները, նրանք ոչ մի էական քայլի չեն գնա: Այստեղ հարց է առաջանում՝ պատրա՞ստ է արդյոք ռուսաստանյան հասարակությունը շարունակելու իր պայքարը: Համենայնդեպս, այդպես չի երևում: Իհարկե, Մոսկվայում տեղի ունեցած բողոքի ակցիաների մասշտաբն այնքան էլ մեծ չէր: Եթե հաշվի առնենք, որ վերջին տարիներին դրանք շատ թույլ կամ փոքրածավալ էին, միևնույն է, այս վերջին հանրահավաքները Մոսկվայի համար այնքան էլ մեծաթիվ չէին: Հիմա շատ կարևոր է, թե ինչ են անելու ցուցարարները, բայց, ամենայն հավանականությամբ, ակցիաները շարունակական բնույթ դժվար թե կրեն»,- նկատեց փորձագետը:
Մանվել Սարգսյանի համոզմամբ, ռուսաստանյան հասարակության բողոքի ալիքն անպայմանորեն իր ազդեցությունը կունենա 2012 թվականի մարտին կայանալիք նախագահական ընտրությունների արդյունքների, այդ թվում՝ ՌԴ ներկայիս վարչապետ, նախագահի թեկնածու առաջադրված Վլադիմիր Պուտինի վարկանիշի վրա:
Հիշեցնենք, որ Մոսկվայում շաբաթ օրը տեղի ունեցած խոշորագույն բողոքի ցույցին, որը կազմակերպել էին անցած խորհրդարանական ընտրությունների արդյունքներից դժգոհ մի շարք կուսակցություններ ու շարժումներ, տարբեր գնահատականներով, մասնակցել էր 35-85 հազար մարդ: Արտոնված հանրահավաքը տևել էր գրեթե 4 ժամ: