Աճող քննադատության պատճառով Կանզասի Tea party խումբը իր կայքէջից հանել է ԱՄՆ նախագահ Բարաք Օբամայի և գարշահոտ փորսուղի համեմատությամբ նկարը:
Ինչպես հաղորդում է Reuters-ը, Կանզաս նահանգի Հուտչինսոն քաղաքում հիմնված The Patriot Freedom Alliance-ն իր կայքում տեղադրել էր գարշահոտ փորսուղի նկար` նշելով, որ փոխել է արծվի պատկերը` որպես նախագահի խորհրդանշան, քանի որ այն «կիսով չափ սև է, կիսով չափ սպիտակ, գրեթե ամեն ինչ, որ այն անում է, վատ է ստացվում»:
Նկարը կայքում էր շաբաթ օրը, բայց արդեն կիրակի այն հեռացվել էր կայքից: Այս մասին հայտնել է Սևամորթների աջակցության հարցերով զբաղվող ազգային ասոցիացիայի Կանզասի ներկայացուցչության նախագահ Դարել Փոփը: Նկարը կայքում չի եղել երկուշաբթի օրը ևս:
Փոփը երկուշաբթի օրն ասել է, որ խումբը փորձել է նկարը ներկայացնել որպես երգիծանք, բայց իրականում դա վիրավորական էր և չարամիտ. «Նման համեմատությունը ռասիստական է, քանի որ հայտնի է, որ Օբամայի մայրը սպիտակամորթ է եղել, իսկ հայրը` սևամորթ»:
Փոփն ասել է, որ դեռ չի կապվել խմբի ներկայացուցիչների հետ` գարշահոտ փորսուղի պատկերը կայքից հեռացնելու հարցով, բայց այն երբեք չպետք է կայքում տեղադրվեր:
Tea party խմբի ներկայացուցիչներից մեկը չի պատասխանել զանգերին, իսկ մյուսը հրաժարվել է որևէ մեկնաբանություն տալ:
