Նորմալ է, երբ «Բարգավաճ Հայաստան» կուսակցությունն «ի գիտություն է ընդունում» և միաժամանակ անարձագանք թողնում Հայ ազգային կոնգրեսի առաջնորդ Լևոն Տեր-Պետրոսյանի՝ վերջին հանրահավաքի ժամանակ արված հայտնի քաղաքագիտական վերլուծությունը: «Առաջին լրատվական»-ի հետ զրույցում այս մասին հայտարարեց Քաղաքական և ընտրական տեխնոլոգիաների փորձագետ Արմեն Բադալյանը:
«Վերլուծությունն ի գիտություն ընդունելը ևս արձագանք է: Քանի որ ՀԱԿ հանրահավաքի ժամանակ ԲՀԿ-ին կոնկրետ առաջարկներ չեն արվել, այլ պարզապես քաղաքական վերլուծություն էր ներկայացվել, բնականաբար, այն պետք է ի գիտություն ընդունվեր:
Պարզ չէր ասվել՝ եկեք համագործակցենք, որ ԲՀԿ-ն էլ արձագանքեր այդ առաջարկին: Եթե համագործակցության անմիջական առաջարկություն արվեր, այդ դեպքում կարող էինք ասել, որ ԲՀԿ-ի պատասխանն ադեկվատ չէ»,- նկատեց Արմեն Բադալյանը՝ հավելելով, որ ԲՀԿ-ն ընտրեց, ըստ իրեն, ամենաարդյունավետ ձևերից մեկը:
