Ռուսաստանի Солидарность և Левый фронт շարժումների ներկայացուցիչները դիմել են Մոսկվայի քաղաքապետարան՝ դեկտեմբերի 24-ին 50 հազարանոց ցույց անցկացնելու խնդրանքով: Այս մասին հաղորդում է Интерфакс գործակալությունը՝ վկայակոչելով Солидарность շարժման քաղխորհրդի անդամ Նադեժդա Միտյուշկինային:
Դեկտեմբերի 24-ին ցույց անցկացնելու պաշտոնական հայց են ներկայացրել նաև Անաստասյա Ուդալցովան, Սերգեյ Պարխոմենկոն և Սերգեյ Դավիդիսը: Ուդալցովան գործակալությանը տեղեկացրել է, որ հայցում որպես ակցիայի անցկացման վայր է նշվում Մանեժի հրապարակը, իսկ որպես այլընտրանքային տարբերակ՝ ակադեմիկոս Սախարովի պողոտան:
Կազմակերպիչ կոմիտեի մեջ, բացի վերը նշվածներից, մտնում են Ալեքսեյ Նավալնին, Բորիս Նեմցովը, Յուրի Սապրիկինը, Բորիս Ակունինը, Գենադի Գուդկովը, Ելենա Լուկյանովան և Վլադիմիր Ռիժկովը:
Հիշեցնենք, որ դեկտեմբերի 10-ին Մոսկվայի Болотная հրապարակում տեղի ունեցավ ընդդիմության արտոնված ակցիան, որին մասնակցեց տարբեր գնահատականներով 20-ից մինչև 80 հազար մարդ:
Ցույցի ժամանակ ընդունվեց բանաձև, որի հիմնական պահանջն է չեղյալ համարել Պետդումայի ընտրությունները: Հակառակ դեպքում ակցիայի մասնակիցները որոշեցին հավաքվել դեկտեմբերի 24-ին: Նույն օրը ԿԸՀ-ն հայտարարեց, որ չի պատրաստվում վերանայել քվեարկության արդյունքները: Իր հերթին՝ ՌԴ նախագահ Դմիտրի Մեդվեդևը Facebook-ի իր էջում գրեց, որ համաձայն չէ ցույցի ժամանակ հնչած կարգախոսների հետ:
