Թուրքական Milliyet թերթի փոխանցմամբ՝ արտաքին քաղաքականության ու ազգային անվտանգության հարցերով Իրանի խորհրդարանի հանձնաժողովի փոխղեկավար Հուսեին Իբրահիմին հայտարարել է, որ Իրանի զինված ուժերը մշակել են Թուրքիայի տարածքում տեղակայվելիք ՆԱՏՕ-ի հակահրթիռային պաշտպանության (ՀՀՊ) համակարգի վնասազերծման պլանը.
«Իրանի վրա որևէ հարձակման դեպքում մենք առաջին հերթին որպես թիրախ ենք ընտրելու այդ համակարգը։ Մալաթիայում տեղակայվելիք այդ ՀՀՊ-ի համակարգի կործանումն Իրանի իրավունքն է։ Այդ համակարգը կոչված է սիոնիստական ռեժիմի պաշտպանությանը։
Այն ՆԱՏՕ-ի պատրվակով տեղակայվում է հենց Իսրայելի համար։ Որպեսզի Թուրքիան խուսափի խնդիրներ ունենալուց, ապա նա պետք է արգելի իր տարածքում այդ համակարգի տեղակայումը։ Մենք ի սկզբանե Թուրքիային զուշացրել ենք, որ այդ համակարգի տեղակայումը Թուրքիայի համար լավ ավարտ չի ունենա»։
Հիշեցնենք, որ օրեր առաջ էլ Իրանի իսլամական հեղափոխության պահակազորի օդա-տիեզերական զորքերի հրամանատար, գեներալ Ամիր Ալի Հաջիզադեն հայտարարել էր, որ իր երկրի՝ հարձակման ենթարկվելու դեպքում իրենց թիրախում ամենաառաջինը հայտնվելու է Մալաթիայի ՌՏԿ-ն, որը տարբեր տվյալներով՝ գտնվում է թուրք-իրանական սահմանից 540-700 կիլոմետր հեռավորության վրա։
