Թուրքական Anadolu գործակալության փոխանցմամբ՝ նախորդ շաբաթ Ֆրանսիայի Սենատի իրավական հարցերով հանձնաժողովի կողմից Հայոց ցեղասպանության ժխտումը քրեականացնող օրինագծի ընդունումից հետո այդ օրինագիծը հայտնվել է Ֆրանսիայի Սենատի օրակարգում։
Մարսելից ընտրված պատգամավոր Վալերի Բոյների պատրաստած այդ օրինագիծը քվեարկության է դրվելու դեկտեմբերի 19-ին։ Օրինագծի հաստատման դեպքում Ֆրանսիայում Հայոց ցեղասպանության հերքողները կպատժվեն մեկ տարի ազատազրկմամբ և 45,000 եվրո գումարով։
Նշվում է, որ Ֆրանսիայի նախագահ Նիկոլա Սարկոզին «կանաչ լույս» է վառել այդ օրինագծի հաստատման առաջ։
Հիշեցնենք, որ այս տարվա հոկտեմբերի սկզբին Սարկոզին Երևանից Թուրքիային կոչ արեց մինչև տարեվերջ ճանաչել Հայոց ցեղասպանությունը՝ սպառնալով, որ հակառակ դեպքում Ֆրանսիան կընդունի Հայոց ցեղասպանության ժխտումը քրեականացնող օրինագիծը։
Երկու օր առաջ Թուրքիայի ԱԳՆ-ն Ֆրանսիային զգուշացրել է չընդունել այդ օրինագիծը։