«Արաբական գարնան» իրադարձությունները ավելի խոցելի են դարձրել Մերձավոր Արևելքում քրիստոնյաների դիրքերը: Ինչպես հաղորդում է ИТАР-ТАСС-ը, այսպիսի կարծիք է արտահայտել Անգլիկան եկեղեցու առաջնորդ՝ Քենթերբերի արքեպիսկոպոս Ռոուեն Ուիլյամսը՝ ելույթ ունենալով բրիտանական խորհրդարանի Լորդերի պալատում: «Այս պահին տարածաշրջանում քրիստոնյաների դիրքերը շատ ավելի խոցելի են, քան երբևէ վերջին հարյուրամյակի ընթացքում»,- ասել է նա:
Արքեպիսկոպոսի խոսքերով, «մշտական սպառնալիքների և հարձակումների հետևանքով քրիստոնյա փախստականների ալիքը Իրաքից զգալի չափով նվազեցրել է այստեղ քրիստոնյա բնակչության թիվը»: Բացի այդ, Եգիպտոսում այժմ նկատվում է ղպտիների աննախադեպ արտագաղթ, չնայած այս երկրում նրանց երկարատև պատմությանը:
Ուիլյամսը նաև քննադատելով նշել է, որ «արևմտյան քաղաքական հռետորաբանությունը կամ ամբողջությամբ արհամարհում է տեղի քրիստոնյաներին, կամ անմտորեն նրանց մղում կրոնական հողի վրա ռազմական հակամարտության՝ դրանով հիշեցնելով «խաչակրաց արշավանքները»»:
