Iran News-ի փոխանցմամբ՝ Իրանի էներգետիկայի փոխնախարար Մոհամեդ Բեհզադն իրանական Mehr News գործակալությանը տված հարցազրույցի ժամանակ հայտարարել է, որ ներկայումս կառուցվում է նոր էլեկտրահաղորդագիծ, որի նպատակն Իրանի, Հայաստանի ու Վրաստանի միջև էլեկտրաէներգիայի ծավալի փոխանակման մեծացումն է.
«400 կիլովատտանոց այդ էլեկտրահաղորդագիծը վերածվելու է եվրոպական երկրների հետ էլեկտրաէներգիայի տարանցման և փոխանակման նոր երթուղու։ Նոր էլեկտրահաղորդագծով իրանական էլեկտրաէներգիան Հայաստանի տարածքի միջոցով կհասնի Վրաստան, ապա նաև Ռուսաստան և եվրոպական երկրներ։
Ներկայումս Իրանի ու Հայաստանի միջև էլեկտրաէներգիայի փոխանակման համար գործում է 230 կիլովատտանոց էլեկտրահաղորդագիծ։ Ենթադրվում է, որ նոր էլեկտրահաղորդագիծը հնարավորություն կընձեռի Հայաստանի տարածքի միջոցով իրանական էլեկտրաէներգիան հասցնել Վրաստանին։ Տվյալ պահին Իրանի ու Վրաստանի միջև էլեկտրաէներգիայի փոխանակումն իրականացվում է Ադրբեջանի տարածքի միջոցով։
Ներկայումս իրանական էլեկտրաէներգիան արտահանվում է դեպի Թուրքմենստան, Թուրքիա, Իրաք, Աֆղանստան և Պակիստան։ Պլանավորված է նաև իրանական էներգոհամակարգի միացումը Պարսից ծոցի հարավային ծովափին ընկած երկրների էներգոհամակարգերին։
Բացի այդ, իրանական կողմը բանակցում է Ադրբեջանի հետ՝ նրա տարածքի միջոցով իր էներգետիկ ցանցը Ռուսաստանի էներգետիկ ցանցին կցելու համար։ Բանակցություններ են տարվում նաև թուրքական կողմի հետ՝ Իրանի էներգետիկ ցանցը Լիբանանի հետ միավորելու համար։
Ենթադրվում է, որ այս բոլոր նախագծերի իրագործման դեպքում Իրանը Մերձավոր ու Միջին Արևելքում կվերածվի տարածաշրջանային էլեկտրաէներգետիկ կենտրոնի»։
