«Առավոտ»-ը գրում է, որ հասարակական տրանսպորտից մամուլի շենքի մոտ իջնել ցանկացող ուղևորների աղաչանք-պաղատանքներին այլևս վարորդներն ընդառաջ չեն գնում, «Էլ առաջվանը չի՜, «ԳԱԻ»–ն թաքնված տեսախցիկներ է դրել, 10 հազար դրամ կտանե՞ս մուծես, որ բռնեն»,–այսպես է արձագանքել վարորդներից մեկը, երբ թերթի թղթակիցը խնդրել է նրան մամուլի շենքի առաջ կանգառ անել։
«Արդեն քանի տարի է՝ մամուլի շենքի դիմաց կանգառ հիմնելու հարցը ոչ մի կերպ չի լուծվում։ Կրկեսից մինչև «Սուրմալու» տոնավաճառ կանգառ չկա։ Մամուլի շենքի մոտ իջնողները համարյա մեկ կանգառ էլ պետք է ոտքով հետ գան։
Հաշվի առնելով, որ այս ձմռան ամիսներին այդ ամբողջ ճանապարհահատվածը սառցակալում է, իսկ շենքերի տանիքներից մետրերով սառցաբեկորներ են կախվում, այդ ճանապարհով քայլելը նույնիսկ շատ վտանգավոր է։
Նշենք, որ տարբեր առիթներով երբ այս հարցը բարձրացվում է, քաղաքային իշխանությունները այս հարցի առնչությամբ պատասխանել են, որ «Երևանի հասարակական տրանսպորտի երթուղային ցանցի լրամշակման աշխատանքներին զուգահեռ, ուսումնասիրվում են նաև կանգառների կանոնակարգման խնդիրները»։