Ռազմավարական և ազգային հետազոտությունների հայկական կենտրոնի տնօրեն, փորձագետ Մանվել Սարգսյանը հակված չէ մտածել, որ Եվրոպական ժողովրդական կուսակցության՝ ԲՀԿ-ի անդամության հայտն աննկատ թողնելը պայմանավորված է հայաստանյան ներքաղաքական իրավիճակով, մասնավորապես ՀՀԿ-ԲՀԿ վերջին շրջանի հարաբերություններով: Նման տեսակետ նա հայտնեց «Առաջին լրատվական»-ի հետ զրույցում:
«Չեմ կարծում, որ այս հանգամանքը պետք է դիտարկել ներքաղաքական իրադարձությունների պրիզմայով, դա ճիշտ չի լինի: Չգիտեմ՝ որքանով է ՀՀ իշխանություններին պետք գնալ, միջազգային ասպարեզում ներքաղաքական բնույթի խնդիրների մասին խոսել: Ինչ ասես՝ կարող է լինել: Առաջինը, ես չգիտեմ՝ որքանո՞վ արժեքավոր է կամ ձևական անդամության գործընթացը: Առավել հակված եմ կարծելու, որ ԵԺԿ-ն ԲՀԿ անունը չի հնչեցրել՝ հաշվի առնելով այն հանգամանքը, որ վերջինիս դժվար է գնահատել որպես դասական կուսակցություն, բացի այդ, Եվրոպան գուցե հաշվի է առնում նաև այն հանգամանքը, որ ԲՀԿ-ն ղեկավարվում է օլիգարխի կողմից»,- նկատեց Մանվել Սարգսյանը՝ հավելելով, որ իր համար, օրինակ, պարզ չէ՝ ինչո՞ւ են հայաստանյան այս 4 կուսակցություններն առհասարակ դիմել ԵԺԿ-ին անդամակցելու խնդրով:
Հիշեցնենք, որ Եվրոպական ժողովրդական կուսակցության անդամակցության հայտ ներկայացրել էին հայաստանյան 4 քաղաքական ուժեր՝ ՀՀԿ-ն, ՕԵԿ-ը, «Ժառանգությունը» և ԲՀԿ-ն: Առաջին երեքի հարցը կքննվի 2012 թվականի փետրվարին, իսկ ԲՀԿ դեպքում ԵԺԿ-ն դեռևս լռություն է պահպանում: