«Ժառանգություն» կուսակցության պատգամավոր, Պետդումայի ընտրություններին Մոսկվայում դիտորդական առաքելություն իրականացրած Զարուհի Փոստանջյանը հանդիպում է ունեցել Գարի Կասպարովի հետ, որը նրա հետ զրույցում նշել է` Ռուսաստանում տեղի ունեցած Պետդումայի ընտրությունները ընտրություններ չէին, քանի որ ամեն ինչ կանխորոշված է եղել նախօրոք գրված սցենարի համաձայն: Այսօր կայացած մամուլի ասուլիսում այս մասին ասաց ինքը` Փոստանջյանը:
«Մենք եղանք ավելի քան 20 ընտրատեղամասերում: Ընտրությունները, իմ անձնական կարծիքով, ընթացել են բազմաթիվ խախտումներով: Ռուսաստանն ընտրությունների անցկացման հետ կապված խնդիրներ ունի: Այն, որ ընտրություններին մասնակցել է ռուսաստանցիների միայն 50 տոկոսը, կարելի է դիտարկել որպես դրանց հանդեպ անտարբերության վկայություն:
Անտարբերության մասին էր վկայում նաև այն փաստը, որ մեր եղած ավելի քան 20 ընտրատեղամասերում տեսանք լրատվամիջոցների միայն մի ներկայացուցչի: Հատկանշական է նաև, որ քաղաքացիներն ընտրում էին բաց կարգով, մտնում էին խմբերով:
Ընտրատեղամասերից մեկում քվեատուփերի բացման և ձայների հաշվարկման ժամանակ պարզվեց, որ դրանցում «Եդինայա» Ռոսիա»-ի օգտին իրար մեջ փաթաթված, տրցակ սարքած ավելի քան 300 քվեաթերթիկներ կան: Մենք արձանագրեցինք սա և հասկացրինք, որ նկատել ենք այս խախտումը, սակայն մեզ ասացին` դրանում տարօրինակ ոչինչ չկա, այդպես կարող են քվեարկել, ասենք, միևնույն ընտանիքի անդամները»,- նշեց պատգամավորը:
Անդրադառնալով հայաստանյան իշխանությունների` «Եդինայա Ռոսիա»-ին հաղթանակի առթիվ անմիջապես շնորհավորելու փաստին` Զարուհի Փոստանջյանը նկատեց, որ դա անօրինական կողմի շնորհավորանքն էր անօրինական կողմին:
«Սրանից, սակայն, Հայաստանի միջազգային հեղինակությունը չի տուժի: Մեր վարկանիշի վրա կազդեն միայն մեր կազմակերպած ընտրությունները: Եթե մենք նախանձախնդիր լինենք և ունենանք իշխանություններ` ձևավորված արդար ընտրությունների միջոցով, դա կբարձրացնի մեր երկրի վարկանիշը»,- ասաց նա:
Ամփոփելով` պատգամավորը չբացառեց, որ արաբական գարունը կարող է կրկնվել նաև Ռուսաստանում:
Հիշեցնենք, որ Ռուսաստանում Պետդումայի ընտրությունները տեղի էին ունեցել դեկտեմբերի 4-ին: Իշխող «Եդինայա Ռոսիա» կուսակցությունը հավաքել էր ընտրողների մոտ 49 տոկոս ձայներ: