Ամբողջ պրոբլեմը նրանում է, թե ինչպես է աշխատում մեր ոստիկանությունը, որն ուղղակի բարլուսախառը մտնում է մարդու տուն, առանց որևէ պատճառի հրմշտոցով հանում և տնից տանում է:
Ինչպես տեղեկացրել էինք, այսօր` վաղ առավոտյան, ոստիկանության 6-րդ վարչության 7 աշխատակիցներ ներխուժել են արձակագիր Արմեն Օհանյանի բնակարան և պահանջել են հետևել իրենց: Ոստիկանները որևէ բացատրություն չեն տվել և ոչ էլ ծանուցագիր են ներկայացրել: Ավելին՝ Արմեն Օհանյանին քաշքշելով տարել էին ԱԱԾ: Արմեն Օհանյանն առանց փաստաբանի հրաժարվել է ցուցմունք տալ, որից հետո ժամը 16:00-ին փաստաբանի`Վահե Գրիգորյանի հետ ներկայացել է և ցուցմունք տվել:
«Ինձ որպես վկա էին տարել մի գործի շրջանակներում, որն ինձ հետ որևէ կապ չունի, ուղղակի գործի շրջանակներում շրջանառվում է իմ ընկերներից մեկի անունը, բայց գործի հետ որևէ կապ չունեմ, և ամեն բան օրենքի շրջանակներում եղավ, ամբողջ պրոբլեմը նրանում է, թե ինչպես է աշխատում մեր ոստիկանությունը, որն ուղղակի բարլուսախառը մտնում է մարդու տուն, առանց որևէ պատճառի հրմշտոցով հանում և տնից տանում է, սա նրանց աշխատաոճն է»,- «Առաջին լրատվական»-ի հետ զրույցում ասաց Արմեն Օհանյանը:
Ի դեպ, Արմեն Օհանյանին հարցաքննել են միջնակարգ կրթության կեղծ վկայականներ տրամադրելու վերաբերյալ գործի շրջանակներում:
Արմեն Օհանյանը բողոքել է ոստիկանների պահվածքից. նրան պարզաբանել են, թե գործը շատ կարևոր է և շատերի տուն են ներխուժել, բերման ենթարկել, այդ թվում՝ այն մարդկանց տները, որոնք կապ չունեն այդ գործի հետ:
Նշենք, որ Արմեն Օհանյանն աշխատում է «Հայաստան» համահայկական հիմնադրամի հասարակայնության հետ կապերի բաժնում: