Եթե Եվրոպայի ժողովրդական կուսակցության նախագահ Վիլֆրիդ Մարթենսը Սերժ Սարգսյանին նույն կուսակցության դիտորդի կարգավիճակի շքանշան է հանձնում, պետք է խորապես կասկածել եվրոպական ժողովրդավարությանը և այն արժեքներին, որ Եվրոպան փորձում է աշխարհով մեկ տարածել: «Առաջին լրատվական»-ի հետ զրույցում նման տեսակետ հայտնեց Հայաստանի Լիբերալ կուսակցության ղեկավար, ՀԱԿ ներկայացուցիչ Հովհաննես Հովհաննիսյանը:
«Եթե նրանք Սերժ Սարգսյանին և նրա ղեկավարած կուսակցությանն ընդունում են որպես ժողովրդական կուսակցություն և նրա ժողովրդավար ներկայացուցիչ, ապա նման ժողովրդավարությունն ինձ պետք չէ: Ուղղակի կարծում եմ, որ եվրոպական իստիտուտները կամ ընդհանրապես կյանքից կտրված են, կամ ուղղակի վերածվել են ամորֆ մարմնի: Ես կամաց-կամաց դադարում եմ ընդունել և հավատալ եվրոպական կառույցների դավանած արժեքներին»:
Նշենք, որ Եվրոպայի ժողովրդական կուսակցության նախագահ Վիլֆրիդ Մարթենսը երեկ ԵԺԿ անդամի կրծքանշան է հանձնել Եվրոպական ժողովրդական կուսակցության պետությունների ղեկավարների հավաքի պատվավոր հյուր Սերժ Սարգսյանին:
Նշենք նաև, որ կուսակցությանն անդամակցելու հայտ են ներկայացրել ՀՀԿ-ն, «Ժառանգությունն» ու ՕԵԿ-ը: Արդյունքները հայտնի կլինեն միայն 2012-ի փետրվարին: