Թուրքական Anadolu գործակալության փոխանցմամբ՝ Թուրքիայի առողջապահության նախարար Ռեջեփ Աքդաղը որոշել է վերջ դնել օրեր առաջ վիրահատության ենթարկված Թուրքիայի վարչապետ Էրդողանի առողջական վիճակի վերաբերյալ մամուլի կողմից շրջանառության մեջ դրված իրարամերժ տեղեկություններին։
Աքդաղն Էրդողանի առողջական վիճակը գնահատել է «շատ լավ»՝ ընդգծելով, որ անհանգստանալու որևէ առիթ չկա. «Նա անգամ ցանկացել է ավելի շուտ սկսել իր աշխատանքը, սակայն մենք նրան խորհուրդ ենք տվել հանգստանալ»։
Հիշեցնենք, որ Էրդողանը վիրահատության է ենթարկվել այս տարվա նոյեմբերի 26-ին՝ աղիներում ծագած խնդիրների պատճառով։ Դրանից հետո չեղյալ էին հայտարարվել նրա մոտակա ծրագրերը, ինչն էլ տարատեսակ մեկնաբանությունների տեղիք էր տվել։
Մասնավորապես հետաձգվել էր Թուրքիայի բարձրագույն ռազմական խորհրդի նիստը (այն կայանալու է դեկտեմբերի 15-ին), որը նախագահելու է Էրդողանը, և որի հիմնական քննարկման առարկաներից մեկը հանդիսանալու են Թուրքիայի տարածքում ՆԱՏՕ-ի ռադիոտեղորոշիչ կայանի տեղակայման հարցը և դրանից բխող իրանական և ռուսական մտահոգություններն ու սպառնալիքները։
Բացի այդ, Էրդողանը հետաձգել է իր կատարյան այցը, ինչպես նաև եռօրյա այցով Թուրքիա ժամանած ԱՄՆ փոխնախագահ Ջոզեֆ Բայդենին (ինչպես նաև այլ օտար բարձրաստիճան պաշտոնյաներին) ընդունել է ոչ թե իր վարչապետական նստավայրում, այլ տանը։
