Կենտրոն և Նորք-Մարաշ համայնքների ընդհանուր իրավասության դատարանում`դատավոր Գագիկ Պողոսյանի նախագահությամբ, պետք է տեղի ունենար ՀԱԿ ակտիվիստների առաջին դատական նիստը:
Դատարանի առջև են կանգնել կալանավորված ՀԱԿ ակտիվիստ Տիգրան Առաքելյանը, գրավի դիմաց ազատ արձակված Սարգիս Գևորգյանը, Դավիթ Քիրամիջյանը և Արտակ Կարապետյանը:
Ինչպես «Առաջին լրատվական»-ի հետ զրույցում տեղեկացրեց ՀԱԿ երիտասարդների պաշտպան Ստեփան Ոսկանյանը, առաջին դատական նիստը հետաձգվեց: «Տիգրան Առաքելյանը ցանկացավ, որպեսզի իր պաշտպանությամբ զբաղվի փաստաբան Վահե Գրիգորյանը: Հաջորդ դատական նիստը դատարանը նշանակեց դեկտեմբերի 22-ին»,- տեղեկացրեց Ս. Ոսկանյանը` հավելելով, որ այս ընթացքում Վահե Գրիգորյանը կծանուցվի և կհասցնի ծանոթանալ գործի նյութերին: Տեղեկացնենք, որ Տիգրան Առաքելյանը մեղադրվում է իշխանության ներկայացուցչի նկատմամբ բռնություն գործադրելու և խուլիգանության մեջ, ինչի համար նախատեսված առավելագույն պատիժը մինչև 5 տարվա ազատազրկումն է:
Հիշեցնենք, որ օգոստոսի 9-ին Երևանի Կարապի լճի մերձակայքում միջադեպ էր տեղի ունեցել ՀՀ ոստիկանության աշխատակիցների և ՀԱԿ ակտիվիստների միջև: Արդյունքում ՀԱԿ ընդդիմադիր ակտիվիստ Տիգրան Առաքելյանը մինչ այսօր անազատության մեջ է:
