Իմ տպավորությունները շատ թարմ են ու վառ: Ունենք բավականին լավ համայնքներ, որոնք նպաստում են հայապահպանությանը: Ինձ համար ամենազարմանալին այն էր, որ Բուենոս Այրեսում կան շատ հայաստանցիներ:
Այս մասին ասաց երգչուհի Արմինկան` անդրադառնալով «Հարավային Ամերիկայի հայ համայնքների կրթամշակութային աջակցություն» ծրագրի շրջանակներում Բրազիլիայում, Արգենտինայում և Ուրուգվայում հոկտեմբերի 2-19-ը տեղի ունեցած բարեգործական համերգներին:
Համերգներն անցնում են շատ ջերմ: Ուրուգվայում դահլիճի մեծ մասը յոթանասունն անց մարդիկ էին, ասաց երգչուհի Արմինկան` տեղեկացնելով, որ իրենք ներկայացրել են միայն հայկական ազգային երաժշտություն` գուսանական ու ժողովրդական երգեր:
«Շատ տպավորված ենք բոլոր համերգներով»,- նշեց նա:
Զարուհի Բաբայանն էլ իր հերթին նշեց. «Թող անհամեստ չհնչի, բայց ես վստահ էի, որ համերգներն անցնելու են շատ լավ»:
«Շատ կարևոր է մնալ հայ, բայց դա շատ դժվար է: Շատ կուզեի, որ սփյուռքի նախարարությունը ստեղծվեր շատ ավելի վաղ»:
Նա ուրախությամբ նշեց, որ Ուրուգվայի ամենագեղեցիկ փողոցը Հայկական փողոցն է:
«Ես հպարտ եմ, որ այնտեղ շատ լավ հայեր կան»,- ասաց երգչուհին:
Արա Գևորգյանն էլ հավելեց, որ Ուրուգվայի հեռուստաընկերության եթերում առաջարկել է, որպեսզի նրանք առաջինը ճանաչեն Ղարաբաղի անկախությունը:
Արա Գևորգյանը ասաց, որ Սան Պաուլոյում հանդիպել է հայ համայնքի երիտասարդներին և առաջարկել գալ Հայաստան, հայկական ակումբները դարձնել ավելի հետաքրքիր, քանի որ մեծ է ձուլման վտանգը: «Եկեք` հայկական ակումբները դարձնենք ավելի հետաքրքիր»:
Զարուհի Բաբայանն էլ ասաց, որ հակասություն չի տեսնում այդտեղ, քանի որ մարդիկ ցանկություն ունեն շփվելու այլ ազգերի ներկայացուցիչների հետ` բացի հայերից:
«Նույն Բուենոս Այրեսի դպրոցում սովորում են արգենտինացի երեխաներ: Նրանք անցնում են հայոց լեզու, բայց ոչ բարձր մակարդակով: Բաց է թողնվել, աչքաթող է արվել դա»,- ասաց երգչուհին` նշելով, որ նրանց միջավայրն է պարտադրում:
Նրա խոսքով` ընտանիքներն ու ծնողները ցանկություն ունեն հայերեն սովորելու:
Երգչուհի Արմինկան էլ շեշտեց`ելքը դպրոցի վարկանիշը, դպրոցի կրթության մակարդակը բարձրացնելն է, որակյալ ուսուցիչներ ունենալը:
«Դա լուրջ խնդիր է, պետք է բարձրացնել կրթության որակը»,- ընդգծեց Արմինկան: Նրա հետ համաձայն էր Զ. Բաբայանը:
