Վերջին շրջանում երևանյան երկու կինոթատրոններում` «Մոսկվա» և «Նաիրի», սկսել են ավելի հաճախ ցուցադրել հայկական արտադրության ֆիլմեր, որոնք հիմնականում կատակերգություններ են: Ներկայումս ցուցադրվող «Ալաբալանիցա» ու «Փեսացուն կրկեսից» կատակերգությունների տոմսերը սպառվում են այնքան արագ, որ հաճախ հարկ է լինում դրանք նախապես ձեռք բերել:
«Առաջին լրատվական»-ը փորձեց ճշտել, թե ֆիլմերը որքան ժամանակ կարող ենք դիտել երևանյան կինոթատրոններում: Ըստ մեր ունեցած տեղեկությունների` «Ալաբալանիցան» դեռ երկար ժամանակ կցուցադրվի կինոթատրոններում, համենայնդեպս «Նաիրիում» այն կցուցադրվի մինչև փետրվար:
Հիշեցնենք, որ դեռ նոյեմբերից «Մոսկվա» կինոթատրոնում ցուցադրվում է «Կարգին ստուդիայի» արտադրության «Ալաբալանիցա» ինտերակտիվ կատակերգությունը, որի ռեժիսորներն են Արման Մարությանը և Վահագն Խաչատրյանը, իսկ ֆիլմի համար երաժշտություն է գրել Ապրիկոտան:
Ֆիլմի գլխավոր դերերում հանդես են գալիս դերասաններ Հայկ Մարությանը, Մկրտիչ Արզումանյանը, Հասմիկ Ղարիբյանը, Նազենի Հովհաննիսյանը, Լևոն Հարությունյանը և այլք:
Ի դեպ, ինտերակտիվ ֆիլմի համար նկարահանված վեց տարբերակի շնորհիվ հանդիսատեսն այն դիտելիս երեք անգամ կարող է միջամտել գործողությունների ընթացքին` իր իսկ հայեցողությամբ փոխելով դրանց ընթացքը:
Ինչպես ավելի վաղ հայտարարել են ֆիլմի հեղինակները, այն չի ցուցադրվելու հեռուստատեսությամբ:
Հիշեցնենք, որ «Ալաբալանիցայի» պատճառով Հեռուստատեսության և ռադիոյի ազգային հանձնաժողովն «Արմենիա» հեռուստաընկերությանը տուգանել է նվազագույն աշխատավարձի 1000-ապատիկի չափով։ Պատճառն այն է, որ «Արմենիան» «Ալաբալանիցա» ֆիլմը գովազդելիս խախտել է համապատասխան օրենքը` խախտելով գովազդի տևողությունը։
