ՀՀԿ-ի սեմինարում ներկայացված արտահանմանն ուղղված արդյունաբերության ռազմավարությունը Հայրենական ապրանքարտադրողների միության նախագահ Վազգեն Սաֆարյանն այսօր լրագրողների հետ հանդիպմանը «հեղափոխական» անվանեց:
Նա նշեց, որ պետությունը պետք է վարկավորի և օգնի արտադրողներին, որպեսզի նոր, մասնավորապես` արևելյան, շուկաներ մուտք գործեն: Ըստ Վ. Սաֆարյանի` վարկերի տոկոսադրույքները պետք է նվազեն մինչև 8-9%: «Տնտեսական գծի լուրջ փոփոխություն ենք տեսնում»,- ասաց Վ. Սաֆարյանը:
«Առաջին լրատվական»-ի հարցին` առաջնահերթ անվանելու համար արդյոք շատ չի՞ ընտրված 11 ուղղությունը, Վ. Սաֆարյանը պատասխանեց` ոչ:
Նրա խոսքով` մինչև 2015-2020 թթ. համար առանձնացվել են 3 ուղղություններ` կոնյակագործություն, դեղարտադրություն և ճշգրիտ ճարտարագիտություն,կստեղծվի 7 հազար աշխատատեղ, իսկ ընդհանուր առմամբ 25 ուղղություն պետք է զարգացվի:
«Պետք է գնալ այնպիսի ոլորտների զարգացման, որոնք մասսայական աշխատատեղեր կբացեն»,- նշեց Վ. Սաֆարյանը` հավելելով, որ պետք է գործարկվի «Նաիրիտ»-ը, զարգացվեն ոչ մետաղական հանքահումքային արդյունաբերությունը, պեռլիտի արդյունաբերությունը, որի գործարանը սեփականաշնորհվել է և մինչ օրս չի աշխատում, պետք է զարգացվի դեղագործությունը, որի միտումներն արդեն նկատելի են, սակայն պետք է զարգացնել թանկարժեք և մեծ շրջանառություն ապահովող դեղերի արտադրության կազմակերպումը:
