«Մի գետը երկու անգամ չեն մտնում: Անցած տարվա փորձը և՛ պետական մարմիններին, և՛ տնտեսվարող սուբյեկտներին ստիպեց լուրջ աշխատանք կատարել: Հավկիթի արտադրությունն ավելացել է, նաև ներմուծման նախադրյալներ են ստեղծվել, և խուճապի հիմք չկա»,- այսօր ասուլիսում հայտարարեց մարքեթինգի մասնագետ Մանասե Եփրեմյանը:
Նա տեղեկացրեց, որ ոչ պաշտոնական տվյալներով` պահեստավորված է մոտ 5 մլն հատիկ հավկիթ, որը ցանկացած պահի կարող է շուկա բաց թողնվել: ՀՀ-ում երկու ամսվա պահանջարկը մոտ 60-70 մլն հատիկ է: Դեկտեմբերին արտադրվելու է 35 մլն հատիկ ձու, պահեստավորվածն էլ կա, կարիքի դեպքում նաև կներկրվի:
Մ. Եփրեմյանը հայտարարեց, որ անցած տարի հավկիթի շուրջը ստեղծված աժիոտաժի արդյունքում Տնտեսական մրցակցության պաշտպանության պետական հանձնաժողովի ընդունած որոշումը այժմ վիճարկվում է դատարանում: Գերիշխող դիրք ճանաչելու հետևանքով արտադրողներից մեկը դուրս է մնացել շուկայից, պնդեց Մ. Եփրեմյանը:
Հայրենական ապրանքարտադրողների միության նախագահ Վազգեն Սաֆարյանի կարծիքով` եթե սադրիչ հայտարարություններ չլինեն, թե` ձու չկա, ապա խուճապ չի առաջանա, և խանութից խանութ վազելու կարիք չի լինի:
