Բրազիլիայի իշխանությունները 1.8 մլն դոլարով տուգանել են ամերիկյան McDonald’s արագ սննդի ցանցին՝ անառողջ սննդի քարոզման համար: Ինչպես հաղորդում է Reuters գորղակալությունը, իշխանությունների կարծիքով՝ McDonald’s-ի Happy Meal ճաշը, որի հետ որպես նվեր տրվում է խաղալիք, երեխաների մոտ զարգացնում է սեր համբուրգերների, տապակած կարտոֆիլի և այլ տեսակի անառողջ սննդի նկատմամբ:
McDonald’s-ը տուգանվել է այն բանից հետո, երբ Սան Պաուլոյի Սպառողների ասոցիացիան կոլեկտիվ բողոք է ստացել տեղի բնակիչներից: ՄԻ խումբ դժգոհ ծնողներ McDonald’s-ին մեղադրել են երեխաների մոտ «աղավաղված արժեքների ձևավորման խթանման» մեջ, որի համար օգտագործվում են ճաշի հետ տրվող տարբեր խաղալիքներ:
McDonald’s-ի ղեկավարությունն առաջին անգամ չէ, որ առաջացնում է Happy Meal ճաշի սպառողների դժգոհությունը: Վերջին շրջանում արագ սննդի ցանցերը սուր քննադատության են ենթարկվել ԱՄՆ առողջապահության մասնագետների կողմից: Մի շարք մասնագետներ, մասնավորապես, պահանջում էին McDonald’s-ից հանել իր գլխավոր խորհրդանիշը՝ Ռոնալդ Մաքդոնալդի կարմրահեր ծաղրածուի նկարը, որի «ներկայությունը», նրանց կարծիքով, գրավում է ռեստորանի փոքր տարիքի այցելուներին:
Նշենք, որ ԱՄՆ մի շարք քաղաքներում Happy Meal-ն արդեն վաճառվում է առանց խաղալիքների:
