Քաղաքականությունը դարձել է միջոցների գնահատում. յուրաքանչյուրը փորձում է գումար, դաշինք ձեռք բերել, մինչդեռ քաղաքականությունը պետք է գաղափարական լինի: Այսօր կայացած մամուլի ասուլիսում նման տեսակետ հայտնեց Ժողովրդական կուսակցության առաջնորդ Տիգրան Կարապետյանը:
«Մենք պիտի ձգտենք ոչ թե միջոցների, այլ ճշմարտության: Ով փող ունի` լկտի է, թիմ ունի` կարողանում է մի բանի հասնել, իսկ ով արդար է` այսօր չի գնահատվում: Նրանք, ովքեր հավատարիմ են նախագահին, լավ պաշտոններ են ստանում»,- նկատեց նա:
Անդրադառնալով Հայ ազգային կոնգրես-«Բարգավաճ Հայաստան» կուսակցության հնարավոր համագործակցությանը` Կարապետյանը նշեց, որ նման բան երբեք չի լինի:
«ՀԱԿ-ը, առաջարկ անելով ԲՀԿ-ին, ցույց է տալիս, որ ինքն էլ է իշխանության թև: Նա բացահայտ ասում է ԲՀԿ-ին` մենք կանք, ցանկացած պահի կարող եք միանալ մեզ: Բայց ինչպե՞ս կարող է ընդդիմությունը համագործակցել կոալիցիայի հետ: Ինչ վերաբերում է ԲՀԿ-ի` ՀՅԴ հետ հնարավոր համագործակցությանը, ապա այն կարող է սահմանափակվել միայն ընտրակեղծիքներ կազմակերպելով: Մենք գիտենք, թե այս տարիների ընթացքում ով ինչ է բաժանել»,- ամփոփեց ԺԿ ղեկավարը` հավելելով, որ խորհրդարանական ընտրություններին ընդառաջ` իր կուսակցությունը ոչ մի քաղաքական ուժի հետ համագործակցության չի գնալու: