Wikileaks. Ալիևը «տակից» է օգնել Վրաստանին ռուս-վրացական պատերազմից հետո

Ըստ Wikileaks-ում հրապարակված ամերիկյան դիվանագիտական գաղտնի մի փաստաթղթի` Ադրբեջանի նախագահ Իլհամ Ալիևը, հանդիպելով ամերիկյան մի դիվանագետի հետ, ասել է որ ինքը բացահայտ չի օգնի Վրաստանին, քանի որ «դրանից էական բան չի փոխվի»: Նա նաև ասել է, որ Ադրբեջանը ոչ բացահայտ օգնություն է ցուցաբերում Վրաստանին: Ալիևն ավելացրել է, որ Վրաստանին ավելի շատ, քան որևէ մեկը, օգնում է իր մարդկանց միջոցով (դիվանագետն իր զեկույցում նշում է, որ, հավանաբար, Ադրբեջանն օգնում է Վրաստանին էթնիկ ադրբեջանցիների միջոցով, որոնք բնակվում են Վրաստանի տարածքում): Ալիևն ասել է, որ ադրբեջանցիները վերանորոգում են երկաթուղային կամուրջը (ավերվել է ռուս-վրացական պատերազմի ընթացքում):
Ալիևը նաև ասել է, որ «վերջին օրերի դեպքերը հերթական անգամ ապացուցել են, որ պետք է ուժեղացվեն Արևմուտքի հետ հարաբերությունները»: «Ադրբեջանն ընտրել է Ռուսաստանից անկախանալու քաղաքականությունը` օգտագործելով դրա համար նավթի և գազի գործոնը: Ադրբեջանը չի պատրաստվում շեղվել այդ ուղուց»,- ասել է Ալիևն իր ամերիկացի զրուցակցին:
Ալիևը փորձել է ամերիկացի դիվանագետից նաև պարզել, թե ինչ կապ է եղել Քրդական աշխատավորական կուսակցության գրոհայինների` Բաքու-Թբիլիսի-Ջեյհան նավթամուղի վրա հարձակման և Ռուսաստանի` Վրաստանի վրա գրոհելու միջև:
Ալիևի կարծիքով, մի քանի գործոններ մեկը մյուսի հետ կապ են ունեցել. ՔԱԿ-ին Ալիևն անվանել է ԿԳԲ-ի պրոյեկտ, դրա համար նրանց հարձակումը նավթամուղի վրա կարող էր կապված լինել երեք օր անց Ռուսաստանի` Վրաստանի վրա հարձակման հետ: Բացի այդ, նավթամուղի պայթեցումը, Բաքու-Սուպսա նավթամուղից ընդամենը 10 մետր հեռավորության վրա իրականացված ռմբակոծությունն ու Ռուսաստանի կողմից Վրաստանի հիմնական երկաթգծային կամուրջի ռմբակոծությունը, որի վրայով տեղափոխվում են նավթային հիմնական պաշարները Ադրբեջանից դեպի վրացական նավահանգիստներ, նույնպես Ալիևի մոտ կասկածներ են առաջացրել, որ դրանց միջև, ըստ նրա, կարող էր կապ լինել: