Կիրակի օրը Ռուսաստանի Պետդումայի ընտրությունները դիտարկելու համար ՀՀ Ազգային ժողովից պատվիրակություն էր մեկնել Ռուսաստան: «Առաջին լրատվական»-ի տեղեկություններով, պատվիրակության կազմում են եղել ԱԺ պատգամավորներ Դավիթ Հարությունյանը, Հերմինե Նաղդալյանը, Արտակ Դավթյանը, Նաիրա Զոհրաբյանը, Արամ Սաֆարյանը, Էդուարդ Շարմազանովը:
ԱԺ «Հանրապետական» խմբակցության քարտուղար, ՀՀԿ մամլո խոսնակ Էդուարդ Շարմազանովն այսօր վերադարձել է ՌԴ-ից, սակայն պատվիրակության մյուս անդամները կվերադառնան վաղը:
«Առաջին լրատվական»-ը Էդուարդ Շարմազանովին խնդրեց կիսվել տպավորություններով, թե ինչպես են անցել ընտրությունները: «Որպես ԱՊՀ Միջխորհրդարանական վեհաժողովի դիտորդական առաքելության ներկայացուցիչ եղել եմ Սանկտ Պետերբուրգում և դիտորդական առաքելությամբ մասնակցել եմ Սանկտ Պետերբուրգի Կալինինի վարչական շրջանի քսանից ավելի ընտրատեղամասերում: Հիմնականում ընտրությունները եղել են նորմալ, և մենք`ԱՊՀ Միջխորհրդարանական վեհաժողովի դիտորդական առաքելությունը, երեկ երեկոյան ընտրություններից հետո ընդունեցինք հայտարարություն, որտեղ եզրակացրեցինք, որ ընտրությունները հիմնականում համապատասխանում էին օրենսդրությանը և ժողովրդավարության համընդհանուր չափանիշներին»,- նշեց նա:
Մեր դիտարկմանը, թե համոզմունք կա, որ ռուսաստանյան վերջին ընտրությունները ամենախնդրահարույցն էին, Շարմազանովը պատասխանեց. «Խնդիրները եղել են միայն տեխնիկական, որտեղ ես ականատես եմ եղել: Հիմնականում` պիկ ժամերին Սանկտ Պետերբուրգում մեծ հոսք սկսվեց, և հերթեր կուտակվեցին: Մենք հանդիպել ենք բոլոր կուսակցությունների ներկայացուցիչների հետ: Կոնկրետ մեկ տեղ «Յաբլոկոն» ունեցել է բողոք հերթերի հետ կապված, բայց հստակ արձագանքել են, իսկ մնացած ընտրատեղամասերում որևէ կուսակցության ներկայացուցիչ որևէ խնդիր չի առաջացրել: Ավելին ասեմ` բավական տոնական մթնոլորտ էր տիրում: Ես որևէ խնդիր չեմ տեսել: Իմ համար շատ ուրախալի է, որ ընտրություններում նախնական արդյունքներով հաղթել է մի կուսակցություն, որը Հայաստանի հանրապետական կուսակցության հետ ունի սերտ համագործակցություն»,- հայտարարեց Շարմազանովը:
Ռուսաստանյան ընտրությունների արդյունքները կազդե՞ն հայաստանյան առաջիկա ընտրությունների ընթացքի վրա՝ հարց ուղղեցինք Է. Շարմազանովին: «Կարող եմ ասել, որ Հայաստանի ընտրություններում այլ պետությունների, քաղաքական ուժերի դերը պետք չի գերագնահատել: Բայց մի բան կարող եմ ասել Հայաստանի հետ կապված` մենք տեսանք, որ Ռուսաստանում հաղթեց «Եդինայա Ռոսիան», և գոնե մեզ համար կանխատեսելի է, թե ինչպիսի ուղիով է գնալու Ռուսաստանը: Կարծում եմ՝ այստեղ էլ պետք է հաջողության հասնեն կոալիցիոն ուժերը` Հանրապետականի գլխավորությամբ, և ավելի կանխատեսելի ու կայուն կլինեն հայ-ռուսական հարաբերությունները»: