Ռուսաստանում կայացած Պետդումայի ընտրությունների ընթացքում «Եդինայա Ռոսիայի» դիրքերի թուլացումն ապացուցում է, որ ժողովուրդը նրա հանդեպ որոշակի անվստահություն է տածում: «Առաջին լրատվական»-ի հետ զրույցում նման տեսակետ հայտնեց Ժողովրդական կուսակցության նախագահ Տիգրան Կարապետյանը:
«Այն մարդիկ, ովքեր արդարությանն են հետևում, իրենց քվեն տալիս են «Սպրավեդլիվայա Ռոսիային», քանի որ այդ կուսակցության առաջնորդ Միրոնովը պաշտոնանկ եղավ հանուն արդարության: Համենայնդեպս, ռուսաստանյան իշխող կուսակցության համար այս ընտրությունները զգուշացում էին, նա վախեցավ: Ընդհանրապես, պայքարը պետք է ընթանա ոչ թե դիմություն-ընդդիմություն դաշտում, այլ արդարության համար: Մեզ մոտ՝ Հայաստանում էլ արդարության ճանապարհով չեն գնում, մեզ մոտ էլ նույնն է՝ իշխանությունը մեկը մյուսին է փոխանցվում՝ աները փեսային և այլն: Բայց չէ՞ որ ժողովուրդը խաղալիք չէ»,- հռետորական հարց հնչեցրեց Տիգրան Կարապետյանը:
ԺԿ նախագահի խոսքով, ՀՀԿ-ն, աչքի առաջ ունենալով «Եդինայա Ռոսիայի» օրինակը, պետք է դասեր քաղի Ռուսաստանում կատարվածից: «ՀՀԿ-ն, մինչդեռ, համարում է, որ ինքն իշխանություն կրողն է, և որ ժողովուրդը միայն իրեն պետք է վստահի: Իշխանություններն, իսկապես, մտածելու շատ բան ունեն: Մենք պետք է արդարությանն ու ճշմարտությանն ապավինենք»,- ամփոփեց Տիգրան Կարապետյանը:
