Ներկայում Հայաստանում տարեկան 5-6 մլն շիշ գինի է արտադրվում, և մինչև 2015 թ. այդ ցուցանիշը կարելի է կրկնապատկել արտահանման համար, և անորակ եռապատկել ներքին շուկայի համար: «Առաջին լրատվական»-ի հետ զրույցում նման տեսակետ հայտնեց Գինեգործների միության նախագահ Ավագ Հարությունյանը: Նրա գանահատականով, կոնյակի դեպքում արդեն գտնվում ենք արտադրության հնարավորությունների առավելագույն սահմանի վրա:
«Մեր շուկայում խնդիրը ներդրումները չեն: Այնքան փող կա, որ մարդիկ չգիտեն, թե ինչ անեն: Խնդիրը որակն է, որ մենք այդ խաղողը չունենք»,- ասաց Ա. Հարությունյանը՝ նշելով, որ գինու արտադրության համար ունենք 2-3 հզ. հեկտար խաղողի այգիներ, 18 մլն շիշ տարեկան շատ թե քիչ նորմալ արտադրության հնարավորություն, որից 10 մլն-ը՝ արտահանման որակ կարող է ունենալ: Այսինքն՝ արտադրության ծավալները կրկնապատկելու համար շատ ջանքեր չեն պահանջվի, բայց եռապատկել չենք կարող, ինչը շատ մտահոգիչ է: Ա. Հարությունյանը շեշտեց, որ կոնյակի առումով մենք սահմանային արժեքի վրա ենք գտնվում: Գուցե հնարավոր լինի դժվարությամբ 50%-ով ավելացնել ծավալները, գուցե և ոչ:
Ա. Հարությունյանի խոսքով, խաղողի այգիների ընդարձակումը շատ դանդաղ է կատարվում: Այգիների տարածքը կրկնապատկելու և այդպիսով ռեսուրսը կրկնապատկելու համար 15-20 տարի է հարկավոր, եթե կառավարությունը չփոխի իր մոտեցումը կոնյակագործության և գինեգործության զարգացման և ոչ թե արտահանման առումով: Ընդ որում, ըստ միության նախագահի, կոնյակագործության արտահանման հետ կապված կառավարությունը ոչ մի բան չպետք է անի, հակառակը, պետք է մի քիչ սահմանափակումներ մտցնի, որ գինեգործությանը չխանգարի: «Ի՞նչ է նշանակում աջակցել կոնյակի արտահանմանը, երբ կոնյակի բնագավառում զբաղված են օլիգարխները և իրենք ֆինանսական ու ներդրումների խնդիր չունեն, կոմունիկացիաների խնդիր և, ընդհանրապես, իրավական դաշտում որևէ խնդիր չունեն: Արտահանման խթանումը պետք է ուղղված լինի գինեգործական սեկտորին, որը չի արվում»,- նշեց Ավագ Հարությունյանը: