«Ազատություն» ռադիոկայանի հետ զրուցում ՃՈ նախկին պետ Մարգար Օհանյանի փաստաբան Մկրտիչ Վասակյանն ասել է, որ թեև Օհանյանը չի ընդունում իրեն ներկայացվող մեղադրանքը, այդուհանդերձ վերականգնել է պետբյուջեին հասցված վնասը: «Ընտանիքի կողմից, մեր կողմից այդ գումարը հավաքվել է, և վերականգնվել է մի քանի տասնյակ միլիոն դրամները», – ավելացրել է Վասակյանը։
Հիշեցնենք, որ Մարգար Օհանյանը, մեղարդվում է պաշտոնեական դիրքը չարաշահելու և առանձնապես խոշոր չափի յուրացումներ կատարելու մեջ: Նրան առաջադրված մեղադրանքը կառուցվել է հիմնականում նրա չորս ենթակաների ցուցմունքների հիման վրա:
Պատասխանելով այն հարցին, թե ինչու է Օհանյանը վճարել այդ գումարները, եթե իրեն մեղավոր չի ճանաչում, փաստաբանն ասել է, թե դա «արժանապատվության խնդիր էր», և եթե Մ. Օհանյանն արդարացվի, ապա այդ գումարները կվերադարձվեն:
Նշենք, որ Մարգար Օհանյանի նկատմամբ հարուցված քրեական գործի նախաքննությունը մոտենում է ավարտին և առաջիկայում կուղարկվի դատարան։
