Ռուսաստանում անցկացված խորհրդարանական ընտրություններում իշխող Единая Россия կուսակցության՝ զգալիորեն քիչ ձայներ ստանալը պայմանավորված է կառավարման անարդյունավետության հանգամանքով: «Առաջին լրատվական»-ի հետ զրույցում նման տեսակետ հայտնեց ԱԺ «Ժառանգություն» խմբակցության պատգամավոր Արմեն Մարտիրոսյանը:
«Ակնհայտ է, որ ռուսաստանցիների վստահությունն այդ կուսակցության հանդեպ նվազել է: Թե ինչ ընտրակեղծիքներ են եղել՝ հստակ չեմ կարող ասել: Միաժամանակ, նույնիսկ Ռուսաստանում, որտեղ տնտեսական ցուցանիշներն ավելի լավն են, քան Հայաստանում, կառավարման անարդյունավետությունը բերեց նրան, որ Ռուսաստանի իշխող կուսակցությունն սպասվածից ավելի քիչ ձայներ ստացա»,- նկատեց նա:
Պատգամավորի խոսքով, ինչ վերաբերում է Հայաստանում տեղի ունենալիք ընտրությունների արդյունքներին, ապա ամեն ինչ կախված է լինելու դրանց արդարության աստիճանից: «Եթե ընտրությունները արդար անցնեն, միանշանակ է, որ հայաստանյան այսօրվա կոալիցիան չի կարող պահել իշխանությունը: Հայաստանում առավել արմատական փոփոխություններ են անհրաժեշտ, որովհետև, ի տարբերություն Ռուսաստանի, ուր, ըստ էության, ընդդիմություն գոյություն չունի, Հայաստանում հրապարակային պայքար կա, նույնիսկ վերջին տարիների ընթացքում քաղաքացիական ակտիվությունն է մեծացել, ուստիև կարծում եմ՝ արդար ընտրությունների պարագայում դրական փոփոխություններ կարող ենք ակնկալել: Ամեն դեպքում, այս պահի դրությամբ՝ ընտրությունների արդար անցկացման մասով հույսեր չունեմ: Իսկ եթե, այնուամենայնիվ, նման բան պատահի, ՀՀԿ-ն կկորցնի իր իշխող դիրք»,- ամփոփեց Արմեն Մարտիրոսյանը:
Նշենք, որ Ռուսաստանում դեկտեմբերի 4-ին կայացած խորհրդարանական ընտրությունների քվեաթերթիկների 95.71 տոկոսի հաշվարկից հետո իշխող Единая Россия կուսակցությունը հավաքել է 49.54 տոկոս քվեներ:
Հատկանշական է, որ Պետդումայի նախորդ ընտրություններում Единая Россия հավաքել էր ընտրողների 64 տոկոս ձայները:
