Սոցիոլոգիական հարցումը մի գործընթաց է, որով պարզում են վարկանիշը: Հայաստանում նմանատիպ ծառայությունները արժեն մոտավորապես 300-36 000 ամերիկյան դոլար:
Սոցիոլոգ Ահարոն Ադիբեկյանը հավաստիացնում է, որ մինչ օրս իր հաշվարկներում չի սխալվել: «Մարդիկ ինձնից նեղանում են, երբ ասում եմ` վարկանիշը ցածր է: Ես հրաշագործ չեմ, որ «ճ» կարգի թեկնածուին նախագահ դարձնեմ: Ընտրվելու համար անհրաժեշտ են մարդկային ռեսուրսներ, դեմքեր, որոնք ներկայացնում են քո ուժը, կազմակերպչական կառույցներ, ֆինանսավորում, տեղեկատվական լավ կանալներ, իշխանության և տեղական հեղինակությունների հետ լեզու: Սրանց առկայության դեպքում դու կարող ես ունենալ հաջողություններ»,- այսօր լրագրողների հետ հանդիպմանը ասաց նա:
Նրա կարծիքով` այս ռեսուրսներն ունեն ՀՀԿ-ն, ԲՀԿ-ն, ՀԱԿ-ը, ՕԵԿ-ը, ՀՅԴ-ն, իսկ «Ժառանգությունը» մի փոքր կասկածելի է:
«Նրանք ունեն լավ դեմք` Րաֆֆի Հովհաննիսյանը, որի վարկանիշը չի իջնում 8-9 տոկոսից: Դա բավական լավ է ազդում ընտրողների վրա, սակայն նախորդ ընտրություններում կուսակցությանը ԱԺ բերեց «Ժառանգության» լոկոմոտիվը:
Հարց է ծագում. այժմ դա կբավարարի՞ «Ժառանգությանը» դարձյալ ԱԺ բերելու,- նկատեց նա ու հավելեց,- դա ցույց կտա հաջորդ տարին, երբ իրավիճակը կփոխվի:
Կգա գարուն, ձմեռվա պաշարները կավարտվեն, մարդիկ կլինեն մի քիչ զայրացած, կատաղած, և կփոխվի սոցիալ-հոգեբանական մթնոլորտը»,- ավելացրեց Ա. Ադիբեկյանը` նշելով, որ սոցիոլոգներն իրավունք չունեն իրենց պատվիրատուին խաբելու:
«Հազար անգամ ասել եմ, որ հանրությունը բաժանված է մի քանի մասերի: Ադիբեկյանի տվյալները երբեք սուտ չեն կարող լինել: Կա մի ընտրազանգված (1.5 տոկոս), որը որոշում կայացնում է վերջում: Մենք մեր հարցումներով փորձում ենք անորոշ արդյունքները հավանական դարձնել: Խաղի կանոններն են այդպիսին»,- ընդգծեց նա ու հավելեց, որ հարցումների արժեքը կախված է, ինչպես ինքն է ասում, «սխալանքի» հետ:
«Թող մարդիկ ինձ անվանեն գռդոնչի, գող, կաշառակեր, բայց ես իմ հաշվարկներում երբեք չեմ սխալվել: Ինչքան փորձում ենք ճիշտ հարցումներ անել, այնքան բարձրանում է գինը, և որքան սուր լինի պայքարը, այնքան բարձր կլինի ժողովրդավարությունը»,- հավելեց նա:
