Ղարաբաղա-ադրբեջանական սահմանին հայ զինվորականների սպանությունները հստակ քաղաքական նպատակ ունեն և Ադրբեջանի կողմից հատուկ են մտածված. նման գործողություններով ադրբեջանական կողմը կարծես անընդհատ հիշեցնում է, որ հարցը լուծված չէ և փորձում է իր սպառնալիքներին ծանրակշիռ տեսք տալ: «Առաջին լրատվական»-ի հետ զրույցում նման տեսակետ հայտնեց Ռազմավարական և ազգային հետազոտությունների հայկական կենտրոնի փորձագետ Մանվել Սարգսյանը:
«Սահմանին հայ զինվորներ սպանելով ադրբեջանական կողմը ճնշում է գործադրում միջազգային հանրության վրա, որպեսզի վերջինս ավելի լուրջ վերաբերվի իր պահանջներին: Բայց հայկական կողմն էլ է կարծես քաղաքականություն դարձնում սահմանին կրակելը: Երևի Ադրբեջանի վրա ազդելու ուրիշ միջոց չտեսնելով և ավելի ազդեցիկ քաղաքականություն չունենալով՝ Հայաստանը դիմում է նույն քայլերին, ինչ ադրբեջանական կողմը: Մինչդեռ քաղաքական, դիվանագիտական ոլորտներում պետք է անել ամեն բան, որպեսզի Ադրբեջանի կրակոցները շատ թանկ նստեն իր իսկ վրա, այսինքն՝ հարցի նկատմամբ պետք է դիվանագիտական հատուկ դիրքորոշում ցուցաբերել, այլապես սահմանին փոխադարձաբար կրակելը հարցի լուծում չէ»,- նկատեց քաղաքագետը:
Ամփոփելով՝ Մանվել Սարգսյանը նշեց, որ Հայաստանը, բացի միջազգային հանրության ուշադրությունն ադրբեջանական կողմի գործողությունների վրա սևեռելուց, պետք է աշխատի, որ գործընթացներն աշխատեն հօգուտ իրեն: «Օրինակ՝ Ադրբեջանի կրակոցները օգուտ են բերում նրա իսկ դիվանագիտությանը, ուրեմն նրանք անընդհատ կշարունակեն կրակել»,- նշեց քաղաքագետը:
